‘Vyama vingi vya ushirika vimejaa walaji’

CHAMA  Cha Mapinduzi (CCM), kimesema vyama vingi vya ushirika hapa nchini vimejaa walaji na hivyo wananchi walio wengi wamekuwa wakidhulumiwa haki zao na vyama hivyo kufa hovyo.

Katibu Mkuu wa CCM, Abdulrahman Kinana, alisema hayo alipokuwa akizungumza na wakazi wa Mabogini, katika Wilaya ya Moshi Vijijini.

Kinana alisema kumekuwa na ongezeko kubwa la vyama vya ushirika kwa ajili ya kusaidia makundi mbalimbali ya watu hapa nchini.
Alisema pamoja na ongezeko hilo, bado baadhi ya vyama hivyo vinaongozwa na wajanja na walaji.

"Nataka niwaambie ndugu zangu ninyi ambao mna ushirika wenu wa wakulima wa mpunga ni lazima kuwa makini katika kuchagua viongozi, msichague kiongozi ambaye hana shamba katika umoja wenu huu," alisema Kinana.

Kinana alisema endapo mtu ambaye si mkulima wa mpunga, akichaguliwa  kuongoza ushirika huo, atakuwa hana uchungu na mali za ushirika.

Aidha katibu mkuu aliujia juu uongozi wa Halmamshauri ya Wilaya ya Moshi Vijijini kwa kushindwa kufikia malengo ya mradi wa kilimo cha mpunga  Mabogini.

Alisema mradi huo wa kilimo cha mpunga ulifadhiliwa na serikali ya Japan miaka 30 iliyopita kwa lengo la kuongeza uzalishaji wa mpunga, lakini mpaka sasa haujafikia lengo.

"Mradi huu ulikuwa na lengo maalum la kuongeza uzalishaji wa zao hili la mpunga, lakini leo ni miaka 30 toka uanzishwe,  kuna hekta 600, lakini wakulima waliopo katika mradi huu ni 3000, sasa tija iko wapi hapa?" alihoji Kinana.

Aliushangaa uongozi huo kuomba fedha zaidi ya sh. milioni 800, wakati hakuna tija yoyote katika mradi huo.

 “Hapana, lazima tuwe na maswali magumu ya kujiuliza,” alisema Kinana.

Kinana: Tusitegemee misaada kutoka nje

NA THEODOS MGOMBA, MOSHI.
WATANZANIA wameshauriwa  kutotegemea misaada kutoka nje ya nchi kwa ajili ya kuwaletea maendeleo yao.

Katibu Mkuu wa Chama Cha Mapinduzi (CCM), Abdulrahman Kinana, alisema hayo alipokuwa akizungumza na wananchi wa Wilaya ya Moshi Vijijini, katika Kata ya Arusha Chini.
Kinana alisema hakuna mataifa kutoka nje ambayo yako tayari  kusaidia maenendeleo ya watu bila ya wao  kujitahidi kuondokana na umasikini.

Alisema tabia hiyo ya kutegemea misaada kutoka nje inawafanya Watanzania kuwa tegemezi na  kusababisha maendeleo kusua sua katika maeneo mengi.

Katibu mkuu alisema ni vyema Watanzania wakaachana na suala la kuwa ombaomba, badala yake watumie  zaidi nguvu zao katika kujiletea maendeleo yao.

"Sisi ni watu huru, hivyo ni lazima kutumia nguvu zetu kujiletea maendeleo yetu na si kuwa ombaomba, huko ni kuendelea kuwa tegemezi,” alisema.

Katibu mkuu  alisema hivi sasa taifa limepiga hatua kubwa katika masuala la maendeleo, hasa maeneno ambayo watu wake wameonyesha juhudi katika kujitolea.
Aidha aliwataka wakazi wa eneo hilo ambalo diwani wake ni wa kutoka upinzani, kuhakikisha kuwa katika uchaguzi mkuu ujao wanairejesha kata hiyo kwa CCM.

Alisema vyama vya upinzani vimekuwa vikiwadanganya wananchi ili kupata madaraka, huku vikiwa havina uwezo wa kuwaletea wananchi maendeleo.

Kinana alitoa mfano wa Katibu Mkuu wa CHADEMA, Wilbroad Slaa, ambaye alidai angemlazimisha mmiliki wa kiwanda cha Sukari cha Moshi (TPC), awaongeze mishahara watumishi wa kiwanda hicho, jambo ambalo halikufanyika mpaka sasa.

"Achaneni na watu ambao wanaingia madarakani kutokana na kusema uongo, kiwanda hiki ni cha mtu binafsi, sasa utawezaje kumlazimisha kuongeza mishahara wewe mwanasiasa, wakati yeye mwenyewe hana uwezo huo?" alihoji Kinana.

 Katibu huyo alimwagia sifa mmiliki wa kiwanda hicho cha sukari kwa kuwa karibu na wananchi wa eneo hilo na kutoa misaada mbalimbali ya kijamii.

ZIARA YA KATIBU MKUU WA CCM, MKOA WAKILIMANJARO

KATIBU Mkuu wa CCM, Abdulrahman Kinana, akisalimiana na Mkuu wa Wilaya ya Moshi, Novatus Makunga, alipowasili katika Kijiji cha Mikocheni, Wilaya ya Moshi,mkoani Kilimanjaro, kuendelea na ziara yake ya kuhimiza uhai wa Chama na kukagua utekelezaji wa ilani ya uchaguzi ya CCM mkoani humo.

MWENYEKITI wa CCM wilaya ya Moshi Vijijini, Gabriel Massenga, akihutubia wananchi, katika Kijiji cha Mikocheni.

KATIBU Mkuu wa CCM, Kinana,akishiriki uvunaji wa mpunga katika shamba lakilimo cha umwagiliaji la Lower Moshi.

MBUNGE wa Moshi Vijijini, Dk. Cyril Chami, akihutubia wananchi katika Kijiji cha Chekereni kata ya Mabogeni.

KATIBU Mkuu wa CCM, Kinana, akizungumza na wanafunzi wa Chuo cha Ufundi Kilimanjaro (KVTC), mjini Moshi.

KATIBU Mkuu wa CCM, akihutubia mkutano wa hadhara, katika Kijiji cha  Mangi, kata ya Kibosho Kati.

KATIBU Mkuu wa CCM, Abdulrahman Kinana (kushoto), akiwasalimu wananchi, alipowasili  katika Kijiji  cha Engikaret, Wilaya ya Longido mkoani Arusha, akiwa katika ziara ya kuhimiza uhai wa Chama na utekelezaji wa ilani ya uchaguzi ya CCM. (Picha na Adam Mzee). Picha zaidi uk. 11.

Kinana awavaa wabunge CCM

• Awataka wasisubiri kuaibishwa, wajipime
• Leizer aibua mapya, kubwaga manyanga

NA WAANDISHI WETU, LONGIDO
CHAMA Cha Mapinduzi (CCM), kimewataka wabunge wake kujipima kama wanatosha kabla ya kuingia tena kwenye kinyang’anyiro cha kuwania kazi ya kuwatumikia wananchi.
Sambamba na hiyo, CCM imewaonya wabunge kuanza kujiengua ili kulinda heshima zao ndani na nje ya Chama.
Katibu Mkuu wa CCM, Abdulrahman Kinana, alitoa agizo hilo juzi wakati akizungumza na wakazi wa Helendeke katika Mji Mdogo wa Namanga mkoani Arusha.
Alisema baadhi ya wabunge wamekuwa waking’ang’ania kuendelea kuwa wabunge bila kujipima kama wana uwezo au la.
Alisema hali hiyo imewafanya baadhi ya wabunge kukosa ubunge kwa kulinda aibu ikiwa ni pamoja na kushindwa katika uchaguzi.
Kwa mujibu wa Kinana, viongozi wengi wamekuwa na tabia ya kuendelea kutaka kutawala bila kujipima kama bado wananchi wanawahitaji au wamewachoka. 
Alisema hatua hiyo inatokana na viongozi hao kutofanya tathimini kuweza kubaini kama bado wanapendwa au wameshachokwa.
“Wapo baadhi hawajipimi kufahamu kama bado wananchi wanawapenda au la. Wanang’ang’ania madaraka mpaka waangushwe tena kwa aibu. Wanafahamu ni kuingia kuwa wabunge, lakini wakati wa kutoka hawajui.
“Wanaokupa madaraka ya kuendelea kuwa mbunge ni wananchi na hasa wana-CCM. Sasa kama hujipimi kuona kuwa wana-CCM wenzako wanaendelea kukupenda au la, utaondoka kwa aibu,” alisema Kinana.
Kinana alimmwagia sifa Mbunge wa Longido (CCM), Lekule Laizer, kwa kutangaza rasmi kuwa hatagombea tena ubunge katika jimbo hilo.
Alisema uamuzi wa Laizer unastahili kuigwa na wabunge wengine ambao wana tabia ya kuona majimbo kama mali yao binafsi.
Awali, akizungumza katika mkutano huo, Laizer alisema ameamua kutogombea kwa hiari yake ili kutoa fursa kwa nguvu mpya kuendeleza jahazi la maendeleo.
“Katibu Mkuu najua hujawahi kuona makabidhiano kati ya mbunge na mbunge na hili hutokana na wengi kuondolewa kwa kuangushwa katika uchaguzi. 
“Sasa nakuahidi kwa mara ya kwanza nitaanzisha utaratibu wa kukabidhi ofisi kwa mimi na mbunge ajae kwa kuwa ninaondoka mwenyewe,” alisema Laizer. 

Sangoma akamatwa na kichwa cha mtu

Na Abdallah Amiri, Igunga
WAKATI kamatakamata ya waganga wa kienyeji ikiendelea kupamba moto katika mikoa ya Kanda ya Ziwa, mmoja amenaswa akiwa na viungo vya binadamu, kikiwemo kichwa ambacho bado kilikuwa na nywele zake.
Mganga huyo, Nyamizi Makunga (70), mkazi wa Kijiji cha Igurubi wilayani Igunga, Tabora, alitiwa mbaroni juzi. Mbali na viungo hivyo, pia alikutwa na vifaa vingine, zikiwemo nyara za serikali.
Mwenyekiti wa Kijiji cha Igurubi, George Henry, alisema Makunga alikamatwa nyumbani kwake kutokana na msako mkali unaendelea kwa lengo la kuwabaini waganga wanaofanya ramli chonganishi.
Msako huo umetokana na kukithiri kwa mauaji ya watu wenye ulemavu wa ngozi, ambapo serikali katika kubaini chanzo, imekuwa ikisaka waganga wanaotuhumiwa kufanya ramli hizo.
Henry alisema polisi walifanikiwa kumnasa Makunga kutokana na taarifa kutoka kwa raia wema, ambapo walipofanya msako walikuta fuvu la kichwa la binadamu likiwa na nywele zake.
Mbali na fuvu hilo, polisi pia walikuta kipande cha mfupa wa binadamu, mkia wa nyumbu, gamba la kobe na ngozi za wanyama mbalimbali.
Wananchi wa Kijiji cha Igurubi, wamepongeza msako unaofanywa na polisi kuwatia mbaroni waganga ambao ndio chanzo cha kushamiri kwa mauaji ya albino.
Pia walisema kwa muda mrefu Makunga amekuwa kikwazo cha maendeleo kwenye eneo hilo kutokana na kufanya mambo kinyume na kwamba wananchi wamekuwa wakimwogopa.
Alipohojiwa, Makunga alikiri viungo hivyo ni vya binadamu na kuwa aliachiwa na baba yake ili kuendesha shughuli za uganga.
Kamanda wa Polisi Mkoa wa Tabora, Suzana Kaganda, alithibitisha kukamatwa kwa mganga huyo akiwa na viungo vya binadamu.

Mabilioni kujenga barabara za juu

WAZIRI wa Ujenzi, Dk. John Magufuli, amesema ujenzi wa barabara za juu katika jiji la Dar es Salaam, utagharimu sh. bilioni 78.

Ujenzi huo wenye lengo la kupunguza msongamano wa magari huku serikali ya Japan ikichangia sh. bilioni 26 kusaidia ujenzi huo.

Akichangia majibu ya swali lililoelekezwa Wizara ya Uchukuzi, Dk. Magufuli alisema tayari mchakato wa ujenzi huo umeanza.

Kauli hiyo ilitokana na maswali ya Mariam Kisangi (Viti Maalum –CCM), kuhoji mpango wa ujenzi wa mji mpya wa Kigamboni pamoja na uwanja wa ndege wenye hadhi ya mji huo.

Awali, akijibu swali la msingi la Mariam, Naibu Waziri wa Ujenzi, Dk. Charles Tizeba, alisema kuna mipango mizuri ya kuendeleza mji wa Kigamboni.

Hata hivyo, alisema mji mpya wa Kigamboni utakuwa ndani ya jiji la Dar es Salaam, ambako kuna Uwanja wa Ndege wa Kimataifa wa Julius Nyerere.

“Kiwanja hiki kina uwezo wa kuhudumia ndege 30 kwa saa baada ya kukamilika kwa upanuzi wa miundombinu na ukarabati wa Awamu ya Pili. Kwa sasa tunahudumia ndege nane kwa saa ambazo ziko chini ya kiwango,” alisema Dk. Tizeba. 

Aliongeza kuwa mpango wa sasa ni kuendelea kukipanua kiwanja hicho kwa kujenga jengo jipyha la tatu.

Ufinyu wa bajeti kikwazo

UFINYU wa bajeti ya serikali umeelezwa kuwa kikwazo kwa wanafunzi wanaosoma kwa lugha za kigeni kupata mafunzo kwa vitendo.
Hata hivyo, serikali imesema jitihada mbalimbali zinaendelea kufanywa ili kuhakikisha wanafunzi wote wanasoma kwa vitendo.
Kusoma kwa vitendo ni njia mojawapo ya njia za kumwezesha mwanafunzi kuwa na uelewa mpana.

Hayo yalielezwa bungeni jana na Naibu Waziri wa Elimu na Mafunzo ya Ufundi, Anne Kilango-Malecela.

Alisema Sera ya Elimu aliyoiwasilisha mezani imeweka mikakati ya kuhakikisha wanafunzi kuanzia ngazi ya awali wanajifunza kwa lugha za kigeni.
Anne alikuwa akijibu swali la Suzan Lyimo (Viti Maalum- CHADEMA), aliyehoji mikakati ya serikali kutoa mafunzo kwa vitendo kwa wanafunzi wanaofundishwa kwa lugha za kigeni kama Kichina, Kiarabu na Kifaransa.
Anne alisema Chuo Kikuu cha Dodoma kilikuwa tayari kutoa mafunzo ya lugha hizo, lakini kikwazo kikubwa kilikuwa kuwapata wanafunzi.
Alisema UDOM ilijipanga kuanza kutoa mafunzo ya lugha ya kiarabu katika mwaka wa masomo wa 2008/ 2009 na mwaka 2009/2010.
“Kundi la kwanza la wanafunzi wa shahada ya sanaa katika lugha ya Kiarabu lilipatikana mwaka wa masomo 2010/11, ambapo wanafunzi sita tu ndio walidahiliwa,” alisema 

Bil. 1.8 zajenga miundombinu ya maji

SERIKALI imetumia sh. bilioni 1.8 kwa ajili ya ujenzi wa miundombinu ya maji katika Kijiji cha Kibirizi wilayani Bukoba.
Fedha hizo zimetumika kuchimba mitaro saba yenye urefu wa kilometa 84 na magati 110, tanki za kuhifadhia huku kazi iliyobaki kwa sasa ni kulaza mabomba na kujenga magati 15.
Naibu Waziri wa Nchi, Ofisi ya Waziri Mkuu (TAMISEMI), Agrey Mwanri, alisema bungeni jana kuwa hatua hiyo inalenga kuhakikisha wakazi wa kijiji hicho wanapata maji safi na salama.
Alikuwa akijibu swali la Jasson Rweikiza (Bukoba Vijijini-CCM), aliyetaka kujua mpango wa dharura wa saerikali kuwapatia maji wakazi wa vijiji vya Omubweya, Kibirizi na Rugaze.
Mwanri alisema miradi hiyo iko kwenye hatua mbalimbali ili kuhakikisha vijiji hivyo vinapata majisafi na salama na kuondoa usumbufu kwa wananchi.

Kinana awalipua viongozi UKAWA

• Awaonya uchu wa madaraka utawamaliza
• Ngome ya CHADEMA Karatu yagaragazwa

Na Mwandishi Wetu, Karatu
KATIBU Mkuu wa CCM, Abdulrahman Kinana, amesema mwisho wa ndoa ya viongozi wa Umoja wa Katiba ya Wananchi (UKAWA), umekaribia.
Amesema muungano huo utabadilika jina na kuwa Ukiwa, ifikapo Oktoba, mwaka huu, wakati mgombea urais wa CCM pamoja na idadi kubwa ya wabunge wake watakapotangazwa washindi.
Alisema kelele nyingi zinazopigwa na viongozi wa UKAWA na mikakati lukuki wanayoizungumza katika kuhakikisha wanashika dola, ni sawa na ndoto za Abunuasi.
Kinana alisema mabadiliko hayo ya jina yanatokana na kelele nyingi pamoja na mikakati mingi wanayoizungumza ya kuchukua madaraka ya urais, jambo ambalo alilisema ni sawa na ndoto ya Abunuasi.
“Siku zote mikakati ya mtu ama chama hakielezi mikakati yake hadharani kama ilivyo kwa UKAWA, ambao wanazunguka na kueleza mambo ambayo kihalisia hayawezekani. 
“Upinzani haujaaminiwa vya kutosha na Watanzania katika kuongoza nchi, hivyo watakuwa na wakati mgumu kwa kuwa CCM bado inaaminiwa,” alisema Kinana.
Kuhusu UKAWA kuwa na mkakati wa kusimamisha mgombea mmoja wa urais, Kinana alisema bado una changamoto nyingi huku viongozi hao kila mmoja kuwa na uchu wa madaraka.
Kutokana na uchu huo wa madaraka, ambao umeanza kuvitikisa vyama hivyo, kwa sasa kila kimoja kimekuwa kikijipanga kutangaza mgombea wake, hivyo mkakati huo kugonga mwamba.
“Hawa jamaa wana uchu wa madaraka, suala la kusimamisha mgombea mmoja halipo. Tayari NCCR -Mageuzi wana mgombea urais, CHADEMA na CUF navyo vimetangaza kutaka kusimamisha wagombea wao, hapa kutazuka mgogoro mzito na watasambaratika kabla ya muda,” alisema.
Ngome Karatu yaanguka
Katika ziara yake wilayani Karatu, Kinana alivunja vunja ngome za CHADEMA na kuzoa wanachama zaidi ya 400, ambao walitangaza kujiunga na CCM.
Jimbo la Karatu ni moja ya ngome imara za CHADEMA, ambapo idadi kubwa ya wanachama waliohamia CCM walieleza kuchukizwa na sera mbovu za chama hicho.
Kinana aliwapokea wanachama hao wapya kwenye mkutano mkubwa wa hadhara uliofanyika uwanja wa Mazingira, ambao ndio uliokuwa ukihitimisha ziara yake wilayani hapa.
Emanuel Karato, akizungumza kwa niaba ya wenzake, alisema amekuwa mfuasi wa CHADEMA kwa zaidi ya miaka 15, lakini amekuwa akikerwa na ubaguzi ulioota mizizi ndani ya chama hicho.
Alisema kitongoji cha Magesho wanachotoka wanachama hao, kinakabiliwa na kero nyingi, ikiwemo ubovu wa barabara, ukosefu wa zahanati, maji safi na salama na migogoro ya ardhi, lakini hakuna walichosaidiwa na viongozi ambao wengi ni wa CHADEMA.
Kinana aliwapongeza wanachama hao kwa kutambua kuwa CCM ndio inayojenga nchi na kuachana na propaganda za upinzani, ambao kazi kubwa ni kupiga kelele zisizo na tija.

VITA YA UJANGILI

Serikali yapewa  ndege ya kisasa

NA KHADIJA MUSSA
WADAU wa utalii na uhifadhi ndani na nje ya nchi wameendelea kuunga mkono jitihada za serikali katika mapambano dhidi ya ujangili, kwenye hifadhi za taifa na mapori ya akiba.

Tangu Waziri wa Maliasili na Utalii, Lazaro Nyalandu, kutangaza vita dhidi ya ujangili na kusisitiza kuwa lazima serikali ishinde, matukio ya mauaji ya tembo na faru yamepungua kwa kiasi kikubwa.
Hiyo inatokana na kuimarishwa kwa ulinzi kwenye hifadhi za taifa pamoja na serikali kusambaza vifaa vya kisasa kwa askari wa wanyamapori ili kuhakikisha inasambaratisha mtandao wa ujangili nchini.
Ni katika kuunga mkono jitihada hizo, Nyalandu amepokea msaada wa ndege ndogo aina ya Micro light Nyinja 5H-HEL yenye teknolojia ya hali ya juu katika kukabiliana na ujangili.
Ndege hiyo iliyotengenezwa kisasa, imetajwa kuwa na uwezo wa ziada tofauti za zingine ikiwemo kuona na kukusanya taarifa za matukio yote yanayoendelea kwenye maeneo inayopita.
Ndege hiyo mpya yenye thamani ya dola 220,000 (sh. milioni 410) imetolewa na Mwenyekiti wa Tanganyika Wildlife Safaris, Eric Pasanisi, kwa ajili ya kupambana na ujangili katika Pori la Akiba la Selous.
Akizungumza mara baada ya kukabidhiwa ndege hiyo katika Uwanja wa Ndege wa Mwalimu Julius Nyerere, Nyalandu, alisema msaada huo unalenga kuimarisha vita dhdi ya ujangili nchini.
Alisema ndege hiyo yenye uwezo wa kutembea mwendo mdogo ikiwa angani, itasaidia kuona majangili na kuwashughulikia, hivyo kuimarisha usalama wa wanyamapori na rasilimali za misitu nchini.
“Ndege hii mpya mbali na kutembea mwendo mdogo pia imetengenezwa kwa usalama wa hali ya juu kwa sababu ina ‘parachute’ ambayo inaweza kuishusha hadi chini iwapo itapata hitilafu kwenye injini ikiwa angani,” alisema.
Kwa upande wake, Pasanisi alisema ndege hiyo itakuwa msaada mkubwa katika kukabiliana na ujangili nchini.

Vigogo wanne wa shule kizimbani kwa rushwa

NA MWANDISHI WETU
TAASISI ya Kuzuia na Kupambana na Rushwa (TAKUKURU) wilayani Nachingwea, imepawandisha kizimbani wajumbe wa kamati ya shule kwa tuhuma za rushwa.
Wajumbe hao walipandishwa kizimbani Machi 11, mwaka huu, katika Mahakama ya Wilaya ya Nachingwea, wakishitakiwa kufanya ununuzi hewa ya vifaa vya ujenzi vyenye thamani ya sh. milioni 1.3 kwa ajili ya Shule ya Msingi Farm Eight.
Kesi hiyo namba CC20/2015, ilifunguliwa Machi 11, mwaka huu, ambapo washitakiwa hao ni Hamza Chidoli (Mwalimu Mkuu) na Liberatus Mwaya (Mwalimu Mkuu Msaidizi). 
Wengine ni aliyekuwa Mwenyekiti wa Kamati ya shule, Somoe Nyagali na mfanyabiashara mzabuni, Jahida Kalinga, ambao walinunua vifaa hewa walivyodai kuwa ni mbao, kokoto na mchanga. 
Katika taarifa iliyotolewa kwa vyombo vya habari na Mkuu wa TAKUKURU wilayani Nachingwea, Moses Oguda, washitakiwa walisomewa mashtaka na Wakili Dismas Mganyizi.
“Makosa wanayoshtakiwa nayo ni kuisababishia hasara mamlaka ya Halmashauri ya Wilaya ya Nachingwea kinyume cha kifungu cha 57 jedwali la kwanza aya ya 10 ya Sheria ya Uhujumu Uchumi Sura ya 200 ya mwaka 2002,” inaeleza taarifa hiyo.  
Kosa la pili ni kutumia nyaraka za kughushi kwa lengo la kumdanganya mwajiri kinyume cha kifungu cha 22 cha Sheria ya Kuzuia na Kupambana na Rushwa Namba 11 ya mwaka 2007. 
Kosa la tatu ni kughushi nyaraka kinyume cha kifungu cha 333, 33(a) na 337 vya Kanuni ya Adhabu Sura ya 16 iliyorejewa mwaka 2002, ambapo kosa la nne ni matumizi mabaya ya madaraka kinyume cha kifungu cha 31 cha Sheria ya Kuzuia na Kupambana na Rushwa ya mwaka 2007.
Katika kosa la tano, washitakiwa hao wanadaiwa kula njama kinyume na kifungu cha 32 cha Sheria ya Kuzuia na Kupambana na Rushwa Namba 11 ya 2007.
Washitakiwa walikana tuhuma hizo na wapo nje kwa dhamana hadi Aprili 13, mwaka huu, kesi hiyo itakapotajwa tena.

Binti wa Nkurumah kuizindua ACT

NA MARIAM MZIWANDA
MTOTO wa Rais wa Kwanza wa Ghana, Dk. Kwame Nkurumah, ambaye pia ni Mwenyekiti wa Chama cha CPP, Samia Nkrumah, anatarajiwa kuwa mgeni rasmi katika uzinduzi wa chama cha ACT-Tanzania.
Uzinduzi huo unatarajiwa kufanyika Machi 27-29, mwaka huu, jijini Dar es Salaam ambapo pia mkutano mkuu wa kwanza wa chama hicho utafanyika.
Samia, ambaye ameandika historia ya kuwa mwenyekiti wa kwanza mwanamke mwenye uwezo wa kuongoza chama kikubwa cha siasa nchini Ghana, atazungumza na wafuasi wa ACT na baadaye kukizindua rasmi.
Kabla ya uzinduzi huo, ACT itafanya mkutano mkuu wake ambapo ajenda kuu itakuwa kuwapata viongozi wa kitaifa, wakiwemo Mwenyekiti, Makamu Mwenyekiti, Katibu Mkuu na manaibu wake.
Habari za kuaminika zinasema mbali na Samia, uzinduzi huo pia utahudhuriwa na mmoja wa marais wastaafu nchini pamoja na viongozi mbalimbali wa vyama na wanasiasa.
Pia watakuwepo mabalozi wanaoziwakilisha nchi mbalimbali nchini, mashirika yasiyo ya kiserikali na Msajili wa Vyama vya Siasa, Jaji Francis Mutungi.
Kwa mujibu wa chanzo chetu ndani ya ACT, kiu ya Watanzania kuwafahamu wanasiasa mahiri na maarufu waliopo nyuma, itakatwa kwenye mkutano huo.
“Maandalizi yote yamekamilika na hapa ndio vigogo wote ambao wapo na ACT lakini hawajajitanga ndio itajulikana. Mengi yamesemwa kuhusiana na chama hiki ila muda wa kuweka mambo hadharani ndio umewadia,” kimesema chanzo hicho.

Mbunge aijia juu Wizara ya Ardhi

Na Happiness Mtweve, Dodoma
MBUNGE wa Kilwa Kaskazini (CCM), Murtaza Mangungu, ameiomba Wizara ya Ardhi, Nyumba na Maendeleo ya Makazi, kutoa muda wa kutosha kuwahudumia wananchi.
Akiuliza swali bungeni jana mjini hapa, Mangungu alisema kumekuwepo na malalamiko ya wananchi kutopata muda wa kutosha kupata huduma mbalimbali kutoka wizarani hapo.
Mangungu alisema wizara hiyo ni nyeti na inategemewa na Watanzania wote kushughulikia huduma mbalimbali katrika eneo la ardhi, nyumba na makazi.
Alihoji kwa nini serikali haiongezi muda wa kazi kwa watumishi wa wizara hiyo ili kuhudumia wateja wengi ikiwa ni pamoja na kutatua  changamoto mbalimbali.
“Kuna tatizo la kuwapiga kalenda wananchi wanapofika kwenye wizara na idara za ardhi, kwa ajili ya kupata huduma,” alisema.
Akijibu swali la msingi na maswali ya nyongeza ya Mangungu, Naibu Waziri wa Ardhi, Nyumba na Maendeleo ya Makazi, Angellah Kairuki, alisema wizara imekuwa ikichukua hatua mbalimbali kuongeza ufanisi katika kuwatumikia wananchi.
Kwa mujibu wa naibu waziri huyo, wizara imekuwa ikiwakemea watumishi wake kwa kutoa huduma kwa ubabaishaji.
Alisema hatua kali za kisheria zitachukuliwa kwa yeyote atakayebainika kuzorota au kutotimiza wajibu wake.

Angella alisema wizara hutoa huduma kuanzia saa tatu asubuhi hadi saa saba mchana kwa siku zote za kazi.

‘Vidhibiti kesi za mihadarati vipo’

SERIKALI imesema ipo sheria na utaratibu maalumu wa kusimamia vidhibiti vya kesi zinazohusu dawa za kulevya na mauaji.
Kauli hiyo ilitolewa jana bungeni mjini Dodoma hapa na Naibu Waziri wa Katiba na Sheria, Ummy Mwalimu, wakati akijibu swali la nyongeza la Rukia Kassim Ahmed (Vita Maalumu-CUF).
Mbunge huyo alitaka kujua zinakopelekwa dawa za kulevya alizokamatwa nazo mshitakiwa mara kesi husika inapomalizika.
“Nataka kujua dawa wanazokamatwa nazo watuhumiwa hupelekwa wapi au huwa zinatumika tena, tunataka tuzione zikiharibiwa,” alisema.
Naibu Waziri Ummy alisema mambo yote kuhusu kesi hizo hufanyika kwa kuongozwa na sheria na kufuata taratibu mahususi za kisheria.
Aidha, alisema adhabu kuhusu kosa hilo zinazotolewa kwa wale wanaothibitika kutenda kosa na si vinginevyo.
Ummy alisema kifungu cha 327 cha sheria ya mwenendo wa makosa  ya jinai, Sura ya 20 kinatamka kwamba mtuhumiwa ataanza kutumikia kifungo chake siku hukumu ilipotolewa.

Muswada wa taasisi za kifedha waja

NAIBU Waziri wa Fedha, Mwigulu Nchemba, amesema serikali itapeleka bungeni  muswada wa sheria ambao utawawezesha wananchi kuanzisha taasisi za kifedha.

Mwigulu alisema hayo jana bungeni mjini Dodoma wakati akijibu swali la nyongeza la Mbunge wa Igunga, Dk. Dalaly Kafumu, aliyetaka kujua lini serikali itawawezesha wakazi wa Igunga kuanzisha  taasisi za kifedha.

Mwigulu alisema muswada huo utaandaliwa na kupelekwa bungeni wakati wowote kuanzia sasa.

Katika swali la msingi, Dk. Kafumu alitaka kufahamu ni lini serikali itaongeza benki nyingine kwa wananchi wa Wilaya ya Igunga.

“Serikali imeweka sheria na utaratibu kusaidia nguvu na juhudi za wananchi kuanzisha benki au taasisi za kifedha katika maeneo yao zikiwemo benki za kijamii na taasisi ndogo za kifedha,” alisema

Kuhusu kuwawezesha wananchi wa Igunga kuanzisha huduma za kifedha na taaisisi za fedha, alisema tayari wameshafanya mazungumzo na Benki ya CRDB na muda mfupi huduma hizo zitapelekwa.

Shekifu alia na tatizo la maji

 MBUNGE wa Lushoto (CCM), Henry Shekifu, amelalamikia tatizo la maji mkoa wa Tanga na kuilaumu serikali kwa kutoa ahadi za mara kwa mara huku ikishindwa kuzitekeleza.
Akiuliza swali bungeni mjini hapa jana, Shekifu alisema kwa muda mrefu serikali iliahidi kupeleka maji katika wilaya ya Muheza lakini haijatimiza.
Aidha, Shekifu alitaka kuhakikishiwa kama kuna fungu lolote lililotengwa kwa ajili ya utekelezaji miradi ya maji katika wilaya hiyo kwenye bajeti ya mwaka huu wa fedha.
“Serikali inatamka nini katika ahadi zake ambazo hazionyeshi kutekelezwa,” alihoji.
Katika swali la msingi la Mbunge wa Viti Maalumu (CCM), Al-Shaymaa Kwegyir, lililoulizwa kwa niaba yake na Shekifu, alitaka kujua ni kwa nini hadi sasa hakuna juhudi za makusudi za kuhakikisha maji yanapatikana kutoka Mto Zigi ili kumaliza tatizo sugu la maji mkoani Tanga, hususan Muheza.
Akijibu swali hilo, Naibu Waziri wa Maji, Amosi Makalla, aliwaomba wabunge kuunga mkono bajeti ya wizara hiyo pale muda utakapofika ili fedha za kutosha zitengwe kwenye miradi mbalimbali mkoani Tanga.
Alisema miradi yote iliyo kwenye ahadi ya serikali itafanyiwa kazi na kukamilishwa kulingana na uwezo wa kifedha utakavyoruhusu.
Kwa mujibu wa Makalla, ili kutatua tatizo la maji katika mji wa Muheza, serikali imeandaa mpango wa muda mrefu wa kuboresha huduma hiyo kwa kutoa maji kutoka Mto Zigi hadi Muheza mjini na vitongoji vyake.
Makalla, alisema wizara kupitia Mamlaka ya Majisafi na Usafi wa Mazingira mkoa wa Tanga ilimwajiri Mhandisi Mshauri kwa ajili ya kufanya upembuzi yakinifu, usanifu wa kina na uandaaji wa vitabu vya zabuni.

Kigoma, Rukwa wahofia wakimbizi kuandikishwa

WABUNGE wa mikoa ya Kigoma na Rukwa wameiomba serikali kuhakikisha wanadhibiti upigaji kura na uandikiswaji katika daftari la wapigakura watu wasio raia wa Tanzania walioko kwenye maeneo ya mipakani.
Kauli hiyo, ilitolewa, bungeni mjini hapa na wabunge, Josephine Genzabuke (Viti Maalum-CCM) na Ally Keisy, (Nkasi Kaskazini-CCM).
Akiuliza swali la nyongeza Gezabuke, alitaka kujua serikali imejiandaa vipi kuchukua hatua mahususi juu ya watu watakaotambuliwa kuwa  wakimbizi wakiwa wamejiandikisha kwenye  daftari la kudumu la wapigakura.
 Alisema zipo taarifa za kuwepo kwa wakimbizi 10 waliojiandikisha kwenye daftari la kudumu la wapigakura mkoani kigoma.
“Serikali inachukua hatua gani kwa wakimbizi hao na wale ambao walipiga kura Karagwe, wakati wa uchaguzi wa serikali za mitaa ambao haukuwa na vitambulisho,” alihoji.
Kwa upande wake Keissy, alihoji ni hatua gani zitachukuliwa na serikali kwa wenyeviti wa vijiji na vitongoji ambao wamechaguliwa wakati si raia wa Tanzania katika jimbo lake.
Akijibu maswali hayo, Naibu Waziri wa Nchi Ofisi ya Waziri Mkuu (TAMISEMI), Aggrey Mwanri, alisema serikali itakuwa tayari kushirikiana na kila mbunge ili kuchunguza masuala hayo na kuchukua hatua.
Mwanri alisema ni jukumu la viongozi wa vijiji, vitongoji, mitaa na wananchi kuwabaini watu ambao si raia au wakazi wa eneo husika na kutoa taarifa kwa mamlaka husika ili hatua ziweze kuchukuliwa.
“Kwa mujibu wa kanuni kabla ya siku ya uchaguzi, orodha ya wapigakura walioandikishwa hubandikwa katika kituo cha kupigia kura ili kuwawezesha wananchi wa eneo husika kubaini watu wasio na sifa wakiwemo wakimbizi,” alisema.
Alisema endapo wakimbizi waliothibitika kupiga au kupigiwa kura katika uchaguzi wa serikali za mitaa mwaka 2014 katika mkoa wa Kigoma, serikali iko tayari kufanya uchunguzi na kuchukua hatua za kisheria.

Chilolo awakumbuka wazee

MBUNGE wa Viti Maalumu Diana Chilolo, (CCM), amehoji mkakati wa serikali kuwasaidia wazee wasiojiweza walioko kwenye maeneo mbalimbali nchini.
Diana alihoji hatua hiyo bungeni mjini hapa jana  alipokuwa akiuliza swali la nyongeza. Mbunge huyo  alitaka kujua ni lini serikali itaanza kuwalipa pesheni wazee wote nchini.
Naibu Waziri wa Kazi na Ajira, Makongoro Mahanga, aliitaka jamii kuwasaidia wazee na kuwaondoa kwenye mazingira ya kuzurura.
Aidha, alizataka halmashauri nchini kuchukua hatua mahsusi kuhusu suala hilo na kutoa mfano wa Halmashauri ya Jiji la Dar es Salaam ambalo liliwarudisha kwao wazee ombaomba.
Kuhusu pensheni,  Mahanga alisema hatua inayofuata ni kukamilisha rasimu ya mpango wa pensheni kwa kuzingatia uzoefu wa nchi zingine.
Alisema kunahitajika ushirikishwaji wa wadau wakiwemo Tume ya Mipango na Wizara ya Fedha na kuwakilisha mpango wa pensheni katika vyombo vya uamuzi.
“Rasimu ya mpango wa pensheni kwa wazee wote imeandaliwa na ziara za mafunzo zimefanyika katika nchi mbalimbali,” alisema
Alizitaja nchi hizo kuwa ni Kenya, Uganda, Mauritius, India, Thailand, China na Indonesia.
Hata hivyo, alisema lengo la ziara hizo zilizohusisha wabunge lilikuwa  kujifunza na kupata uzoefu wa nchi katika kuendesha mipango ya pensheni kwa wazee.

Uandikishaji BVR Njombe bado tatizo

Na Michael Katona, Njombe

KAZI ya uandikishaji wa daftari ya kudumu la wapigakura kwa Mfumo wa Kielektroniki (BVR) katika mkoa wa Njombe, limeanza rasmi katika kata za Mjimwema, Yakobi na Kifanya.

Hata hivyo, uandikishaji huo umeanza kwa kulalamikiwa na wananchi kwamba unasuasua na kusababisha wananchi wachelewe kwenye vituo, kutokana na mtu mmoja kutumia muda mrefu kujiandikisha.

Mwandishi wa habari hii alitembelea kata ya Mjimwema, katika vituo vya Melinze, Mjimwema, NJOSS, Mpechi na Joshoni na kushuhudia msongamano wa wananchi waliopanga foleni kujiandikisha.

Pia alishuhudia mwananchi mmoja akitumia dakika 20 kuandikishwa,  jambo ambalo lililalamikiwa na wananchi.

"Nipo hapa kwa muda mrefu katika kituo cha Melinze. Nimesimama toka saa 12 alfajiri nikiwahi labda nitaweza kujiandikisha mapema, lakini nilipomwuliza mtaalamu, alisema picha ninayopigwa ni lazima iende makao makuu Dar es Salaam halafu ndiyo kitambulisho kitoke," alisema Maria Sanga mkazi wa Melinze.

Robert Mkongwa, mkazi wa mtaa wa Melenzi, akiwa amejiandikisha alisema ameshuhudia kazi hiyo ikicheleweshwa na tatizo la vidole vyake kukataa kutambuliwa kwenye mashine kisha kurudia zaidi ya mara tatu.

"Kilichonikuta ni uzoefu wa kuchukua taarifa zangu uandikaji ulikuwa taratibu, alama za vitole ziligoma. Nimerudia mara tatu ndiyo zikakubali. Nimetumia  zaidi ya dakika 20 nikiwa ndani mpaka kukamilika na kupata kitambulisho," alisema Mkongwa

Uchunguzi umeonyesha kuwa uandikishaji wa wananchi katika hilo umekuwa ukichukua dakika nyingi baina ya watu watano kitu ambacho kimekuwa kikilalamikiwa na wananchi.

Kutokana na hali hiyo wengine wamekuwa wakiondoka  na kupeana namba za simu kwa ajili ya kupata taarifa kama  foleni imesogea ili aweze kurudi kujiandikisha.

"Mimi nadhani hii kazi itakuwa na changamoto nyingi kwa hapa Njombe. Wataalamu wanaosimamia hii mitambo kwa ajili ya uandikishaji naona wengi hawana utaalamu wa kutosha, maana wamekuwa wakitumia muda mrefu kwa mtu mmoja," alilalamika Said Husein mkazi wa Joshoni.

Akizungumza juzi kabla ya uandikishaji haujaanza, Mratibu wa Uchaguzi Mkoa wa Njombe, Hilmar Danda, alisema mashine 250 zimesambazwa kwa kazi hiyo  huku akiahidi kutojitokeza usumbufu wa msongamano kwa kuwa  kila baada ya dakika tano mtu mmoja angekuwa ameshajiandikisha.

"Zile changamoto zilizojitokeza kule Makambako, tume imejipanga na kuzitatua. Iwapo mashine moja  ingeleta dosari, tatizo hilo tumejipanga kulikabili," alisema Danda.

Mwandishi pia alipita katika vituo vya Mpechi na NJOSS na Mjimwema na kukuta misururu mirefu kwa ajili ya kujiandikisha, ambapo baadhi ya wananchi walilalamikia hali ya kuchelewa kujiandikisha.

"Nipo hapa tangu saa 11 alfajiri kwa ajili ya kuwahi kujiandikisha, lakini huwezi amini mtu akiingia ndani ya kituo anachukua zaidi ya dakika 20 hadi anapotoka. Hii  hali naona inaleta kero sana," alisema Janeth Mligo mkazi wa NJOSS.