Phil Neville, Giggs kumsaidia Moyes

KOCHA mpya wa Manchester United, David Moyes ameanza kazi kwa kupanga safu ya benchi la ufundi kwa kuwajumuisha wakongwe wa klabu hiyo.
Phil Neville, ambaye ameichezea Man Utd kwa muda mrefu kabla ya kujiunga na Everton, atakuwa katika benchi akimsaidia Moyes. Winga mahiri na mchezaji wa karne Ryan Giggs naye amepewa kazi ya ukocha japo atakuwa akicheza pale inapohitajika. Lengo la Moyes ni kusuka kikosi imara na ameanza kutafuta sapoti ya wakongwe ili kuleta ushawishi na utulivu katika vyumba vya kubadilishia nguo.

 
PHIL Neville (kushoto) akifanya mazoezi na kaka yake Garry. Wote wamekulia na kucheza soka Old Trafford.

Rooney apewa masharti Man Utd

MSHAMBULIAJI wa Man Utd, Wayne Rooney ametakiwa kuandika rasmi barua ya kuomba uhamisho iwapo amepanga kuondoka kwenda kutafuta changamoto mpya kwenye klabu nyingine. Rooney anadaiwa kutofautiana na aliyekuwa kocha wa Man Utd, Sir Alex anahusishwa na mipango ya kuhamia klabu za Chelsea, Arsenal, Barcelona na PSG. Hata hivyo habari kutoka ndani ya Old Trafford zinasema iwapo atauzwa basi atapelekwa kwenye klabu za ligi nyingine na si Uingereza. Zaidi peruzi www.dailymail.co.uk

Hatimaye Morsi ang'olewa Misri

KWA mara nyingine mapinduzi yamefanyika nchini Misri. Rais Morsi ambaye alichaguliwa kuongoza taifa hilo baada ya kung'olewa madarakani kwa aliyekuwa Rais wa Misri, Hossen Mubarak tena kwa maandamano makubwa yalidumu kwa zaidi ya miezi kadhaa, naye ameng'olewa kwa njia hiyo hiyo. Jeshi limetangazan jana usiku kuchukua uongozi na kwamba, Morsi si rais tena. zaidi tembelea www.dailymail.co.uk

Mtandao mabomu Arusha wabainika

NA LILIAN JOEL, ARUSHA
MTANDAO wa ulipuaji mabomu katika Jiji la Arusha umebainika na kwamba, mipango yote ilianzia jijini humo, pamoja na wahusika wake.
Taarifa za awali kutoka Jeshi la Polisi zinasema milipuko iliyotokea katika Kanisa Katoliki la Mtakatifu Joseph Mfanyakazi, Olasiti na ule wa Uwanja wa Soweto inafanana, licha ya mabomu hayo kutengenezwa nchi tofauti.
Bomu lililolipuliwa uwanja wa Soweto, Juni 15, mwaka huu, limetengenezwa nchini China na lile la kanisani lililolipuliwa Mei 5, mwaka huu, imebainika lilitengenezwa Russia na halikuwa na namba ya usajili.
Imeelezwa wataalamu wa mabomu kutoka China wapo jijini Arusha wakifanya uchunguzi wa kina kuhusu bomu hilo.
Mkuu wa Mkoa wa Arusha, Magesa Mulongo, amesema uchunguzi wa milipuko hiyo unaendelea na hakuna atakayebainika atakayeachwa atambe.
Mulongo alisema hayo jana, kwenye kikao cha Kamati ya Ushauri ya Mkoa (RCC).
Alisema makachero wa polisi na  vyombo vingine vya ulinzi bado wapo jijini hapa wakiendelea na kazi na kwamba, mtandao wa walipuaji umebainika.
“Uchunguzi unaendelea, wa awali umebaini mtandao wa walipuaji mabomu. Matukio na mipango yote ilianzia hapa na muda si mrefu mbichi na mbivu zitawekwa hadharani,” alisema.
Alisema serikali itachukua hatua kali na zinazostahili kwa yeyote atakayebainika kuhusika na mtandao huo bila kujali cheo, kwani matukio hayo yameharibu sifa ya taifa kimataifa.
Mkuu wa mkoa alisema idadi kubwa ya wananchi ilijitokeza kutoa ushahidi wa watu waliohusika katika matukio hayo na kwamba, kazi hiyo inafanyika kwa umakini ili kuepuka kukamatwa wasiohusika.
“Wananchi ni watulivu na wanashirikiana na vyombo vya ulinzi na usalama, hatutaki kufanya makosa kwenye kazi hii,” alisema.
Mulongo aliwaonya wanasiasa na kuwaasa kuacha kutumia milipuko hiyo kama ajenda za kisiasa, kwani kufanya hivyo ni kuongeza maumivu kwa walioathirika na kupoteza ndugu zao.
“Wanasiasa wamekuwa wakitumia uongo mwingi dhidi ya serikali na kuichafua nchi duniani, hivi tunajiuliza ni kwa faida ya nani?
“Ni wakati sasa wa kuacha dharau ya wazi kwa vyombo vya dola, kama huviheshimu ni mwanzo wa kuvuruga amani mbele ya safari,” alisema.

JK: Asanteni

na waandishi wetu
RAIS Jakaya Kikwete amewashukuru wananchi kwa kushiriki kikamilifu na kufanikisha kwa kiwango cha juu matukio ya kitaifa, ikiwemo ziara ya siku mbili ya Rais Barack Obama wa Marekani.
Obama, mkewe Michelle na watoto wao Malia na Sasha walitua nchini Jumatatu wiki hii wakitoka Afrika Kusini na waliondoka juzi.
Matukio mengine yaliyofanyika kwa mafanikio kutokana na mchango wa wananchi ni  Majadiliano ya Ushirikiano kwa Manufaa ya Wote na Mkutano wa Wake wa Marais wa Afrika uliomalizika jana, jijini Dar es Salaam.
Miongoni mwa wageni maarufu walioshiriki mkutano huo ni Rais wa zamani wa Marekani, George W. Bush na mkewe Laura. Pia ulihudhuriwa na wake wa marais wa Afrika Kusini, Ethiopia, Msumbiji, Ghana, Sierra Leone na Uganda.
Rais Kikwete pia amewashukuru viongozi na wasimamizi wa matukio na shughuli hizo, kwa kutoa uongozi thabiti ambao umewezesha mambo kumalizika vizuri na malengo yaliyokusudiwa kufikiwa.
Amevishukuru vyombo vya habari nchini kwa mchango mkubwa wa kutoa habari na kuwaelimisha wananchi kabla, wakati na baada ya matukio yenyewe.
Katika shukrani hizo, Rais Kikwete pia amezishukuru taasisi na vyombo vyote vya serikali, vikiwamo vya ulinzi na usalama kwa kufanya kazi bila kuchoka ili kufanikisha shughuli hizo.
“Napenda kutumia nafasi hii kuwashukuru wananchi wote, hususan wakazi wa Dar es Salaam, kwa mchango wenu mkubwa katika kufanikisha matukio haya muhimu ya kitaifa.
“Kwa pamoja tumeonyesha ukarimu wetu wa jadi kwa viongozi na wageni ambao wameshiriki katika matukio hayo,” alisema.
Aliongeza: “Tumeonyesha uvumilivu na utulivu mkubwa wakati wote wa matukio hayo. Natambua mazingira yanayojengeka tunapokuwa na ugeni mkubwa wa nje, lakini bado tumeonyesha ukomavu wa hali ya juu kama taifa.
 “Nawashukuru ninyi wananchi kwa kufanikisha yote haya kwa sababu bila ushiriki wenu pengine matokeo ya shughuli hizo yangekuwa tofauti. Najivunia ushiriki wenu katika shughuli zote hizi za kitaifa. Mmeijengea nchi heshima kubwa.”

WASOMI WAMPONGEZA
Katika hatua nyingine, baadhi ya wasomi wamempongeza Rais Kikwete kwa jitihada za kuhakikisha diplomasia ya uchumi inakua.
Wamesema ziara za marais Xi Jinping wa China na Obama wa Marekani, zimemfanya Rais Kikwete kuiweka Tanzania katika alama ya kimataifa.
Kwa mujibu wa wasomi, ujio wa viongozi hao umefanyika wakati muafaka kwa Watanzania na kwamba, serikali imetenga maeneo maalumu ya ushirikiano wa kidiplomasia ili kuharakisha maendeleo.
Mkuu wa Idara ya Sayansi ya Siasa na Utawala wa Umma wa Chuo Kikuu cha Dar es Salaam, Dk. Benson Bana, alisema Rais Kikwete anastahili pongezi, kwani ameonyesha uimara mkubwa katika diplomasia ya kimataifa.
“Tuipongeze serikali na Rais Kikwete kwa kuiweka Tanzania katika alama ya dunia kimataifa, kuja kwa marais hawa si jambo dogo na linapaswa kuenziwa,’’ alisema.
Alisema licha ya Tanzania kuwa masikini, lakini ni imara katika ramani ya dunia kutokana na ujio wa viongozi wakubwa, na Watanzania hawapaswi kubeza hata kidogo.
Dk. Bana alisema serikali imefanya kazi ya kutosha katika kuitangaza vyema sera ya diplomasia ya uchumi kimataifa, kwa kuwa Rais Obama hakuja nchini kwa ziara ya kitalii.
“Ziara ya Rais Obama ni ya kikazi, ndiyo maana amefuatana na kundi la watu na wasaidizi wake, hivyo ni wakati muafaka kwetu kuitumia fursa hiyo kwa kuunganisha ushirikiano wa kibiashara,’’ alisema.
Naye Profesa Sifuni Mchome, ambaye ni Katibu Mtendaji wa Tume ya Vyuo Vikuu (TCU), alisema ziara ya Rais Obama ilikuwa na umuhimu mkubwa kwa taifa.
“Tukae na kuangalia ni maeneo yapi tunayopaswa kuwekeza nguvu katika ushirikiano wa kidiplomasia, kwa kuwa bado tuna matatizo katika baadhi ya maeneo, hususan elimu na teknolojia,’’ alisema.

Alisema serikali iendelee kuzitumia kikamilifu ziara za viongozi hao kujenga ushirikiano wa kidiplomasia katika maeneo ambayo bado yapo nyuma na yanahitaji msukumo ili kusonga mbele.

Nyalandu: Simba hatarini kutoweka

NA RABIA BAKARI
UJANGILI wa wanyama katika hifadhi za taifa nchini, umeendelea kushika kasi na sasa, majangili yamekuja na mbinu mpya ya kuwaua Simba.
Awali, ujangili huo ulijikita zaidi katika kuua Tembo kwa ajili ya meno, lakini sasa Simba nao wapo hatarini kufuatia moyo wake kudaiwa kutumika kwa imani za kishirikina.
Kufuatia hali hiyo, serikali inafanya mazungumzo na Shirikisho la Polisi wa Kimataifa (Interpool) kwa ajili ya kusaidia mapambano dhidi ya tembo, simba na wanyama wengine.
“Tumetangaza rasmi kuwa ujangili ni janga la kitaifa, majangili sasa wameanza kuwaua mpaka samba.
“Na unazidi kushika kasi ukihusisha imani za kishirikina,” alisema Naibu Waziri wa Maliasili na Utalii, Lazaro Nyalandu.
Nyalandu aliyasema hayo jana, alipotembelea banda la Wizara ya Maliasili na Utalii, katika viwanja vya Maonyesho ya 37 ya Kimataifa ya Biashara, Dar es Salaam.
Alisema lengo la kuzungumza na Interpool ni kutaka msaada wa kudhibiti njia zote zinazoingia katika nchi za Maziwa Makuu ikiwemo viwanja vya ndege na njia nyingine zinazotumika kupitisha nyara hizo.
Pia, alisema Serikali ya Marekani imekubali kusaidia jitihada za serikali katika kupambana na ujangili nchini.
“Wengi hasa katika nchi za Asia, wanaamini kuvaa bidhaa iliyotengenezwa na pembe za ndovu ama meno ya tembo kunaleta bahati.
“Na kama mwanamke hajaolewa, basi ataolewa na mtu tajiri..lakini sasa ujangili wa Simba umeshika kasi, wengi wanaamini mwanaume akipata moyo wake basi atakuwa na uwezo wa kuoa mwanamke zaidi ya mmoja, na imani nyinginezo,” alifafanua.
Hata hivyo, alisema serikali itawashughulikia wale wote wanaowatuma vijana kufanya vitendo vya ujangili na kuiba nyara za serikali bila kujali cheo wala itikadi.
“Vijana tunaowakamata kwa asilimia kubwa sio wahusika, hukamatwa wakiwa hawana hata viatu, wahusika ni wenye tai walioko huku mijini..hata wale watakaobainika kuwahifadhi watakuwa hatiani,” alisema Nyalandu.
Alitumia fursa hiyo kuwaasa wananchi kutoa ushirikiano wa hali na mali kwa kuwafichua majangili na wafadhili wao ili kufanikisha ulinzi wa maliasili za nchi.
Nyalandu, alisema soko la utalii limepanda kwa kiasi kikubwa, na kwa mwaka jana, nchi iliingiza dola za kimarekani bilioni 1.5 (Sh.bilioni 24) na kusaidia pato la uchumi kwa asilimia 17.
Lakini kutokana na matukio ya ujangili, huenda kukaathiri maendeleo hayo.

Wafanyakazi 49 watimuliwa TANESCO

NA SELINA WILSON
WAFANYAKAZI 49 wa Shirika la Umeme Tanzania (TANESCO), wamefukuzwa kazi kati ya Juni mwaka jana na mwaka huu, kutokana na kujihusisha na vitendo vya rushwa na wizi.
Kaimu Mkurugenzi wa TANESCO, Injinia Felischemi Mramba, alisema hayo jana wakati akizungumzia hatua zinazochukuliwa katika kulisafisha shirika hilo, kwenye kongamano la wadau wa nishati na gesi.
Mramba, alisema watumishi hao ni kutoka kada mbalimbali wakiwemo mameneja  wa vitengo, mafundi na wataalamu mbalimbali.
Kaimu Mkurugenzi huyo alisema bado wanaendelea kuisafisha TANESCO na wananchi wenye kero au jambo linalohusiana na vitendo hivyo watoe taarifa ili hatua zichukuliwe.
Alisema hivi karibuni, walimsimamisha mfanyakazi wa shirika hilo baada ya kuzembea kushughulikia taarifa ya dharura ya kukatika umeme kwa siku saba.
Mramba alisema mlalamikaji alimpigia simu kutoa taarifa na hatua zikachukuliwa mara moja.
“Kwa TANESCO hakuna siri katika uwajibikaji, tulisaini mikataba ya utendaji bora na mameneja wa mikoa ili kuhakikisha wanatoa huduma stahiki, atakayezembea anachukuliwa hatua,” alisema Mramba.
Alisema mikataba hiyo walisaini mwaka 2007 na tangu kipindi hicho, kumekuwa na ongezeko kubwa la wateja wanaounganishiwa umeme.
Idadi hiyo imeongezeka kutoka wateja 36,000 hadi kufikia 94,000 mwaka jana.
Mramba alisema mambo waliyokubaliana ni utendaji bora, usimamizi na uaminifu wa wafanyakazi, hivyo inapotokea uzembe, hatua zinachukuliwa mara moja.

Mapambano ya polisi, majambazi yaua mmoja

NA LILIAN JOEL ARUSHA
POLISI jijini hapa wamepambana kwa risasi na watu wanaosadikiwa kuwa majambazi yaliyokuwa yamejificha ndani ya nyumba na kufanikiwa kumuua mmoja.
Jambazi liliouawa, limetambuliwa kwa jina la Lembris Taiko (35), maarufu kama Dk. Mbushi.
Anadaiwa kusakwa kwa zaidi ya miaka miwili kutokana na kuhusika na matukio mbalimbali ya ujambazi.
Akizungumza na Waandishi wa Habari mjini hapa jana, Kamanda wa Polisi Mkoa wa Arusha, Liberatus Sabas, alisema Polisi walipambana na majambazi hayo jana saa 11.15 alfajiri katika mtaa wa Onjaftan, Sokoni one.
Alisema Polisi walipata taarifa toka kwa raia mwema kuwa jambazi hilo na wenzake wawili walikuwa ndani ya nyumba moja inayomilikiwa na mtu aliyefahamika kwa jina moja la Swalehe, ambaye wakati wa tukio hilo hakuwepo.
Kufuatia taarifa hizo, Polisi waliizingira nyumba hiyo na baadhi waliingia ndani na kuwataka waliokuwemo kujisalimisha, lakini  ghafla walianza kushambuliwa na majambazi hayo.
Mapambano ya risasi baina ya polisi na majambazi hayo yalidumu kwa dakika kadhaa, ambapo wawili walifanikiwa kutoroka na Dk. Mbushi aliuawa.
“Huyu Dk. Mbushi tulikuwa tunamsaka kwa muda mrefu sasa, ana matukio mengi ya uhalifu na mauaji hapa Arusha na katika Mikoa ya Dar es Salaam, na Kilimanjaro,” alisema Kamanda huyo.
Alisema baada ya tukio hilo, Polisi walifanya upekuzi katika nyumba hiyo na kukuta bastola aina ya Bereta iliyofutwa namba ikiwa na risasi moja chemba, ganda moja la risasi na risasi tatu za Shotgun na funguo za milango 26.

Tanzania yaongoza kwa saratani

NA MWANDISHI WETU

RAIS Jakaya Kikwete, amesema Tanzania inaongoza kwa kuwa na wagonjwa wengi wa saratani ya shingo ya kizazi katika nchi za Afrika Mashariki.
Kikwete aliyasema haya juzi alipokuwa akihutubia mkutano wa siku mbili wa wake wa Marais wa Bara la Afrika uliomalizika jana, katika Hoteli ya Serena, Dar es Salaam.
Alisema serikali ya Tanzania inaamini kuwa uchumi wa taifa unakuwa kufuatia watu wenye afya kujihusisha katika shughuli za kuongeza kipato.
Hata hivyo, alisema wamejipanga kukabiliana na magonjwa mbalimbali ukiwemo ugonjwa wa malaria na ukimwi.
Kwa mujibu wa Rais Kikwete, katika kukabiliana na hilo, wameanza kutekeleza mpango wa miaka mitano ya kukabiliana na magonjwa hayo.
Katika mkutano huo, Rais Kikwete alimshukuru Rais mstaafu wa Marekani, George W. Bush, kwa kuunga mkono Serikali ya Tanzania katika jitihada mbalimbali za kupambana na ugonjwa huo.
Naye, Rais Bush, alisema ataunga mkono jitihada zinazofanywa na serikali ya Rais kikwete katika kukabiliana na ugonjwa huo.
Alisema ufadhili huo umechangiwa na uhusiano wa muda mrefu baina yao.
Katika kukabiliana na ugonjwa wa malaria, wataweka mipango ya muda mrefu.
Hata hivyo, Mke wa Rais wa Zambia, Dk. Christine Kaseba, alipongezwa na Rais Bush kwa kuanzisha taasisi ya kupambana na magonjwa ya saratani nchini kwake.
Pia, alilipongeza Shirika la Misaada la Umoja wa Mataifa (UNAID), kwa misaada inayosaidia nyanja mbalimbali nchini.

Maswi awatangazia kiama wala rushwa

NA MWANDISHI WETU
SERIKALI imetangaza kiama kwa watumishi watakaojihusisha na rushwa, kuwa watatimuliwa kazi bila kujali madaraka yao.
Onyo hilo lilitolewa na Katibu Mkuu wa Wizara ya Nishati na Madini, Eliakim Maswi, wakati akizungumza kwenye kongamano lililoandaliwa kwa ajili ya wadau kutoa maoni juu ya utekelezaji wa miradi 29 katika sekta ya nishati.
Miradi hiyo imo kwenye mpango wa serikali wa matokeo makubwa kwa muda mfupi, lililofanyika jana, mjini Dar es Salaam.
Alisema wananchi na wadau wanapaswa kutoa taarifa za kuombwa rushwa zilizosababisha kukwama kwa baadhi ya miradi ili hatua zichukuliwe mara moja.
Maswi, alisema wafanyakazi wa serikali hususan wizarani kwake, wanapaswa kuwa waadilifu.
“Kama mtaalam au kamishna atajaribu kula rushwa sitakuwa na msamaha wala kigugumizi katika kuchukua hatua, tumekubaliana kufanya kazi kwa uadilifu,” alisema.
Alidai binafsi aliwahi kushawishiwa kutia saini kupitisha moja ya miradi iliyoko chini ya wizara yake kwa kuahidiwa kupatiwa dola za Marekani 200,000 (Sh. milioni 320), lakini hakushawishika na baadaye kuamua kuufuta mradi huo.
Alisema yapo matukio ya wizi wa nyaya na mafuta ya transfoma, lakini wezi ni Watanzania na wanaokaa gizani baada ya wizi ni Watanzania wenyewe.
Alisema hakuna yeyote ambaye yuko tayari kuwataja wezi wanaokwamisha miradi mbalimbali yenye manufaa kwa taifa, na badala yake watu wamebaki kulalamika.
Alisema katika utekelezaji wa miradi, wizara itamwezesha mwekezaji, ambaye yuko tayari kuwekeza kwa manufaa ya serikali lakini si kwa wababaishaji na wezi.
“Hatutaki wababaishaji ambao wanatembea na mikataba ya makubaliano (MOU) mifukoni na kufanya ujanja ujanja, mtu unamfahamu kabisa kula yake tabu halafu anakuja ofisini anataka kuwekeza,” alisema.
Katika kongamano hilo, wadau walipata fursa ya kutembelaa maonyesho ya miradi 29 itakayotekelezwa na kupata maelezo mbalimbali kuhusiana na miradi hiyo.

Baada ya Obama kuondoka, Dar kama zamani

MUUZA viatu akivinjari katikati ya jiji baada ya Rais Obama kuondoka kama alivyokutwa jana. Taarifa zaidi na picha kuhusu kurejea kwa machinga, mama ntilie, gereji bubu na msimamo wa serikali, SOMA UHURU KESHO.

JK atua Sabasaba

RAIS Jakaya Kikwete ameendelea kuwa busy na leo ametinga katika Viwanja vya Maonyesho ya Kimataifa ya Sabasaba, mjini Dar es Salaam. Itakumbukwa wiki yote JK alikuwa busy na ugeni mkubwa ulikusanyika nchini akiwemo Rais wa Marekani, Barack Obama. Bravo JK.

RAIS Kikwete akiingia katika viwanja vya Sabasaba, pembeni yake ni Waziri wa Viwanda na Biashara Dk. Abdallah Kigoda.

Hapa akipata maelezo kutoka kwa mmoja wa wafanyabiashara

Mossy: Wazazi washiriki kumwinua mtoto wa kike

Na Samson Chacha, Tarime
KAMPENI za kupinga unyanyasaji kwa wanawake na watoto wa kike nchini, zimeendelea kuungwa mkono kutokana na kujikita zaidi katika kusaidia jamii.Tayari taasisi mbalimbali zimejitokeza kuunga mkono kampeni hizo zinazoendeshwa na Kampuni ya Nyumbani Kwanza Media Group (NkMG), ambapo sasa Umoja wa Waandishi wa Habari Wilaya za Tarime na Rorya mkoani Mara, zimeahidi kuunga mkono katika kuhabarisha jamii.
Msimamo huo umetolewa jana wakati wa kikao baina ya Umoja huo wa wanahabari na Mkurugenzi Mtendaji wa Nyumbani Kwanza Media Group, Mossy Magere, kilichofanyika mjini ambapo, waliahidi kushiriki katika kuhamasisha na kuhabari jamii.
Mbali na kampeni za kupinga unyanyasaji ambazo zimezinduliwa Machhi 3, mwaka huu, wilayani hapa na Waziri wa Kazi na Ajira, Gaudentia Kabaka, pia harakati mbalimbali ikiwemo kuhamasisha wazazi na wahisani kuchangia ujenzi wa mabweni kwa watoto wa kike, zimekuwa kiendeshwa kupitia kampuni hiyo.
Hatua hiyo inalenga kuwaondolea watoto wa kike changamoto zinazowakabili ikiwemo mimba, utoro na wengine kutumikishwa kufanya kazi za majumbani na kwenye machimbo ya dhahabu.
Akizungumza na viongozi na wanachama wa umoja wa wanahabari hao, Mossy alisema kwa sasa NkMG wanaendesha harambee kwa ajili ya ujenzi wa ,mabweni katika shule mbalimbali wilayani Tarime.
Amesema wanafunzi wa kike wamekuwa wakinyanyasika na kukosa haki za msingi kutokana na kukosekana kwa mabweni na kwamba, jamii inapaswa kuamka ili kuwakomboa na kutengeza kikazi bora.
"Ni lazima tuwalinde watoto wa kike ili wapate haki zao za msingi, tunajitaji kuunganisha nguvu katika hili. Kwa sasa tunafanya harambee kuchangia ujenzi wa mabweni kwenye sekondari zetu hapa Tarime na baadaye tutakwenda maeneo mengine,” alisema Mossy.
Alisema shule nyingi ambazo hazina mabweni wanafunzi wa kike wamekuwa kwenye hatari kubwa ikiwemo kutumikishwa, kubakwa na wengine kuwekwa vimada, jambo linalowafanya kukosa elimu.
Kuhusu harambee hiyo, Mossy aliwahimiza wazazi na walezu kujitokeza kushiriki kikamilifu ili kuhakikisha sekondari ya Ingwe iliyopo Nyamongo inakuwa na mabweni kwa ajili ya watoto wa kike.
Kwa upande wake, Kiongozi wa Tarime Press Club, Samson Chacha, akizungumza kwa niaba ya wenzake alisema, wameunga mkono jitihada hizo za Mossy na kwamba, watakuwa naye bega kwa bega ili kuhakikisha motto wa kike Tanzania anakombolewa.

Rooney atua Carrington

Mshambuliaji wa Man Utd ambaye yuko njiapanda kuendelea kuichezea msimu ujao, Wayne Rooney amewasili katika viwanja vya mazoezi vya klabu hiyo, Carrington kukutana na kocha mpya David Moyes. Mazungumzo baina ya Rooney na maofisa wake pamoja na viongozi wa Man Utd yanafanyika baadaye leo, ambapo itajulikana iwapo ataendelea kuwa ndani ya kikosi ama la.

WAYNE Rooney akiingia katika viwanja vya Carrington leo asubuhi.

Kocha mpya wa Man Utd, David Moyes naye akiingia Carrington kukutana na kijana wake wa zamani, Rooney

Misri hali ni tete

Hali si shwari nchini Misri, ambapo maelfu ya wananchi wameendelea kuandamana kushinikiza kuachia ngazi kwa Rais Morsi. Jana usiku zaidi ya watu 20 wameuawa na wengine 200 kujeruhiwa vibaya huku wananchi wakijaribu kutaka kudondosha helkopta ya jeshi kwa kutumia kamba.www.dailymail.co.uk

JK, Obama waonyesha kiwango

RAIS Jakaya Kikwete na Rais wa Marekani, Barack Obama wakionyesha umahiri wa kusakata kabumbu. Hapa JK akipiga danadana kuonyesha yuko vizuri wakati walipotembelea mradi wa kuzalisha umeme wa Symbion uliopo Ubungo, Dar es Salaam.

NAJIBU MAPIGO: Rais Obama naye akionyesha kiwango cha kusakata kabumbu kwa kupiga danadana kwa kichwa. Mpira huo uliokuwa kivutio kikubwa kutokana na kuzalisha umeme.

HUJAMBO KOMREDI: Rais Obama akisalimiana na Katibu Mkuu wa Wizara ya Nishati na Madini, Eliakim Maswi, baada ya kutambulishwa na Rais Kikwete.

TUPO PAMOJA: Rais Obama akimweleza jambo Maswi huku Rais Kikwete, Waziri wa Nishati na Madini Profesa Sospeter Muhongo na Mkuu wa Mkoa wa Dar es Salaam, Mecki Sadiki wakisikiliza.

Kwaherini

Na Selina Wilson
RAIS Barack Obama wa Marekani, ameondoka nchini jana mchana kurejea nyumbani, baada ya kuhitimisha ziara ya kihistoria ya siku mbili, ambapo ameacha neema ya umeme.
Obama aliwasili jijini Dar es Salaam, juzi, saa 8.37 mchana na kupokewa na mwenyeji wake, Rais Jakaya Kikwete, ambaye jana alimsindikiza kupanda ndege yake, Air Force One kurudi Marekani.
Kiongozi huyo wa taifa kubwa na lenye nguvu kiuchumi na kijeshi duniani, alifuatana na familia yake, mkewe Michelle na watoto Malia na Sasha, ambao walilakiwa na umati wa Watanzania.
Rais Obama ambaye muda wote wa ziara alionekana mwenye furaha, alikuwa akisalimiana na kucheka na watu kabla ya kukiri kuwa anajihisi yuko nyumbani.

Awali, Rais Barack Obama wa Marekani, alizindua mradi  mkubwa wa kuziwezesha nchi za Afrika kupata umeme wa uhakika.
Kupitia mradi huo, nchi hizo zitapata nishati hiyo mara mbili zaidi ya kiasi kilichopo, lengo likiwa kusaidia kuharakisha maendeleo.
Uzinduzi huo ni utekelezaji wa sera mpya ya Marekani kwa nchi za Afrika, katika kuziwezesha kuboresha sekta ya nishati. Mradi huo unalenga kuongeza uzalishaji hadi kufikia megawati 10,000.
Rais Obama alizindua mradi huo jana, Ubungo, Dar es Salaam, kwenye mtambo wa kuzalisha umeme wa gesi katika kituo cha Kampuni ya Symbion kutoka Marekani.
Katika hotuba ya uzinduzi, Rais Obama alisema anaamini mradi huo utatekelezwa kwa mafanikio, kwani ana matumaini makubwa na utendaji wa Rais Jakaya Kikwete na serikali yake.
Alisema kwa kuanzia, mradi huo utatekelezwa katika nchi sita za Afrika, Tanzania ikiwa ya kwanza kwenye orodha.
Rais Obama aliyekuwa nchini kwa ziara ya kikazi ya siku mbili, alisema lengo ni kuwafikia watu milioni 20 barani Afrika.
Ili kutekeleza mradi huo, Rais Obama alisema serikali ya Marekani imetenga dola bilioni saba (takriban sh. trilioni 11.2), ambapo sekta binafsi nchini humo imetenga dola bilioni tisa (sawa na sh. trilioni 14.4).
Hata hivyo, alitaka jitihada ziongezwe katika usimamizi wa miradi ili ikamilishwe kwa wakati, kwa kuwa kuna changamoto ya ucheleweshaji utekelezaji wa miradi ya maendeleo.
Alisema ni vyema miradi inayowagusa wananchi, hususan vijijini ikakamilishwa kwa wakati ili kuharakisha maendeleo na kuwafanya waishi maisha bora.
“Tunahitaji idadi kubwa zaidi ya Waafrika watumie umeme, ndiyo maana tumelenga kufikia watumiaji milioni 20. Umeme ukifika vijijini kutakuwa na uhakika wa maendeleo.
“Wafanyabiashara na wenye viwanda wapate umeme wa uhakika ili kuendesha shughuli zao bila changamoto ya kukosa nishati hiyo,” alisema.
Rais Obama alisema mabadiliko ya kimaendeleo katika ukuaji uchumi barani Afrika yatachochewa na uhakika katika uzalishaji umeme.
Alisema serikali ya Marekani imejizatiti ili kuhakikisha nchi za Afrika zinafungua fursa za kuboresha sekta za viwanda na biashara kwa kuzalisha zaidi na kuuza nje.
Rais Obama alisema jambo muhimu ni kushirikiana na sekta binafsi katika utekelezaji miradi ya uzalishaji umeme, kwani Marekani imefanikiwa kwa kuishirikisha sekta hiyo.
Alisema nchi hiyo itaendelea kushirikiana na Tanzania katika maeneo mbalimbali kwa lengo la kuimarisha urafiki uliodumu kwa muda mrefu.
“Marekani imeisaidia Tanzania katika maeneo mengi, ikiwemo kupambana na malaria na maambukizi mapya ya virusi vya ukimwi. Pia katika sekta za elimu na kilimo kupitia mpango wa Feed the Future,” alisema.

MPIRA WA NISHATI

Kabla ya uzinduzi huyo, Obama na mwenyeji wake Rais Jakaya Kikwete, walionyeshwa mipira miwili ya gesi, ambayo inaweza kutumika kuzalisha nishati ya kuwasha taa na kuchaji simu. Mipira hiyo inapochezwa ndipo inapozalisha nishati.
Mipira hiyo ni teknolojia iliyobuniwa na vijana wenye miaka 25, Jessica Matheus, ambaye ni Mkurugenzi wa Kampuni ya Uncharted Play Inc na Victor Angel, ambaye ni Makamu wa Rais wa kampuni hiyo.
Obama alirushiana mpira na Rais Kikwete ili kuongeza uzalishaji nishati na baadaye kufanya majaribio kwa kuwasha tochi na kuchaji simu.
Akizungumzia utekelezaji wa mpango huo kwa Tanzania, Waziri wa Nishati na Madini, Profesa Sospeter Muhongo, alisema sera mpya ya Marekani kuhusu nishati kwa bara la Afrika ni mpango mzuri.
Profesa Muhongo alisema wizara imejipanga vyema na imelenga kuboresha umeme vijijini na mijini, ambapo uzalishaji utaongezeka kutoka megawati 1,438.24 na ifikapo 2015 utaongeza mara mbili.
“Tunataka tufikishe megawati 2,880, lengo hasa ni kufikisha megawati 3,000, hivyo kitendo cha Marekani kupanga kuboresha sekta hiyo barani Afrika ni kuunga mkono jitihada za serikali,” alisema.
Alisema katika ziara ya Rais Obama, walifanya mazungumzo kuhusu mradi wa kuzalisha megawati 400 kutokana na gesi mkoani Mtwara, unaotekelezwa na Symbion na General Electric,  ambapo sasa zitazalishwa megawati 600.
“Ziara hii imetusaidia, naamini hata wananchi wa Mtwara watafurahi zaidi kutokana na Symbion kuongeza megawati 200,” alisema.
Katika eneo la Ubungo, ulinzi uliimarishwa huku baadhi ya makachero wakilazimika kupanda juu ya ghorofa la makao makuu ya Shirika la Umeme Tanzania (TANESCO) na kwenye mitambo ya Symbion ili kuhakikisha usalama.
Umati ulifurika katika Barabara ya Morogoro ambayo ilifungwa kwa ajili ya msafara wa Rais Obama. Kati yao walikuwa wakifuatilia uzinduzi huo na wengine wakitembea kwa miguu.

DONDOO KUHUSU SYMBION

Symbion yenye makao makuu Washington D.C, ndiyo inasimamia ukarabati na ujenzi wa miundombinu ya umeme inayofadhiliwa na serikali ya Marekani.
Kwa kipindi cha miaka mitano ijayo imepewa jukumu la kutekeleza miradi ya umeme itakayowekezwa na serikali ya Marekani barani Afrika.
Symbion nchini inajenga mradi wa megawati 600 na pia itajenga  njia ya kusafirisha umeme yenye urefu wa kilomita 650.
Ina vituo vitatu vya kuzalisha megawati 217 za umeme Arusha, Dodoma na Dar es Salaam. Cha Ubungo kinazalisha megawati 112 kwa kutumia gesi.

MICHELLE ASISITIZA ELIMU

Mke wa Rais wa Marekani, Michelle Obama, ametaka kuepukwa mila na tamaduni zinazomkandamiza mtoto wa kike, ikiwemo kumkosesha haki ya kupata elimu, anaripoti Suleiman Jongo.
Michelle alisema hayo jana, mjini Dar es Salaam, wakati wa ufunguzi wa mkutano wa siku mbili wa kimataifa wa wake wa marais wa Afrika.
Alisema endapo mila potofu dhidi ya mwanamke zitaachwa, harakati za mapambano dhidi ya umasikini zitafanikiwa. Miongoni mwa mila hizo alisema ni mfumo dume, ambapo kipaumbele cha elimu hutolewa kwa watoto wa kiume pekee.
Michelle alisema alizaliwa katika familia yenye kipato cha wastani na si tajiri, lakini wazazi wake hawakuwa na ubaguzi katika kuwasomesha, hivyo yeye na kaka zake walipata elimu sawa na kuwa kichocheo katika mafanikio yake.
Kwa mujibu wa Michelle, elimu kwa mtoto wa kike ni nyenzo muhimu itakayomrahisisha kutimiza majukumu ya nyumbani na katika jamii kwa jumla.
Alimpongeza Mke wa Rais, Mama Salma Kikwete kwa jitihada za kuwasomesha watoto wa kike nchini.
Alisema amevutiwa na Mama Salma, ambaye ni Mwenyekiti wa Taasisi ya Wanawake na Maendeleo (WAMA), kwa kuwasomesha watoto wa kike.
Rais Jakaya Kikwete akifungua mkutano huo, alisema mfumo dume bado unaendelea kutumika katika jamii mbalimbali barani Afrika, hivyo mabadiliko yanahitajika.
Alisema familia nyingi zinamtazama mwanamke kama mtu wa kukaa nyumbani, hastahili kupewa fursa muhimu, ikiwemo kumiliki ardhi na rasilimali nyingine za msingi.
Mama Salma kwa upande wake aliishukuru Taasisi ya Kuwawezesha Wanawake Duniani ya George W. Bush, ambayo ndiyo imedhamini mkutano huo kwa kuichagua Tanzania kuwa mwenyeji.
Alisema Tanzania inajitahidi kutekeleza majukumu ya msingi, ikiwemo kumuelimisha mwanamke na kukabiliana na maradhi, yakiwemo magonjwa ya ukimwi na malaria.
Kwa upande wake, Laura Bush, mke wa Rais mstaafu wa Marekani, George W. Bush, alisema mwanamke akielimishwa anakuwa msaada mkubwa katika jamii na taifa kwa jumla.
Aliwashukuru wake wa marais wa Afrika kutokana na hatua ya kushiriki mkutano huo. Alisema yeye na mumewe wanaunga mkono jitihada za ukombozi wa mwanamke duniani.
Wengine waliohudhuria mkutano huo ni mke wa Waziri Mkuu mstaafu wa Uingereza, Tony Blair, Cherie Blair. Pia wake wa marais wa Uganda, Msumbiji na Afrika Kusini.

FBI YAPONGEZA ULINZI

Shirika la Upelelezi la Marekani (FBI), limepongeza timu ya ulinzi nchini, ikisema iko imara kiutendaji, anaripoti Rabia  Bakari.
Kamanda wa Polisi Kanda Maalumu ya Dar es Salaam, Kamishna Suleiman Kova, alisema hayo jana, baada ya Rais Obama na ujumbe wake kuondoka nchini.
Kova alisema maeneo ambayo yamepongezwa ni kumudu ratiba za kiusalama na operesheni ya ulinzi kwa jumla.
“Wenyewe wamekubali, wamesema wamekutana na watu wenye upeo katika ulinzi. Pia ushirikiano wa dhati waliopata wakati wote walipokuwa nchini kabla na baada ya rais wao kuja,” alisema.
Alisema mambo yote yalikwenda vizuri, kwani hakuna taarifa ya tukio lolote baya.
Hata hivyo, alisema wanakutana ili kutathmini ziara ya rais huyo na baadaye matokeo yatawekwa wazi kwa wananchi.

UMATI BARABARANI

Kabla ya Rais Obama kuondoka, shughuli za kijamii na kiuchumi zilisimama kwa muda kwenye baadhi ya maeneo ya jiji, anaripoti Mohammed Issa.
Umati ulijipanga kwenye barabara za Bagamoyo, Sam Nujoma, Morogoro, Mandela na Nyerere, ambako msafara wa Rais Obama na ujumbe wake ulipita.
Barabara za Morogoro, Mandela na Sam Nujoma zilifungwa kwa muda ili kupisha msafara wa rais huyo.
Katika makutano ya barabara hizo eneo la Ubungo, baadhi ya wananchi walipanda juu ya ghorofa ili wamuone kiongozi huyo.
Baadhi ya waendesha bodaboda walipanda juu ya vyombo hivyo vya usafiri ili wamuone Rais Obama, aliyekuwa anakwenda kwenye mitambo ya kuzalisha umeme ya Symbion.
Katika kituo kikuu cha mabasi yaendayo mikoani na nchi jirani cha Ubungo, abiria waliokuwa wasafiri mchana waliungana na wananchi wengine waliokuwa na shauku ya kumuona Rais Obama.
Ulinzi uliimarishwa mara dufu eneo hilo, ambapo kulikuwa na magari ya maji ya kuwasha, polisi wa kikosi cha mbwa na farasi, askari wa doria, upelelezi na askari wa SUMA JKT.
Maofisa usalama wa Marekani nao walitanda kila kona wakiwa na vifaa maalumu vya ulinzi.
Rais Kikwete aliwasili TANESCO saa 4.32 asubuhi, ambapo wananchi waliojipanga barabarani walimshangilia, ambapo baadaye helikopta ya polisi ilionekana ikifanya doria.
Saa 4.41 asubuhi, msafara wa Rais Obama ukiwa na magari 31 uliwasili Ubungo na kuibua shangwe na nderemo kutoka kwa wananchi.
Msafara huo uliondoka Ubungo saa 5.24 asubuhi kwenda Uwanja wa Ndege wa Kimataifa wa Julius Nyerere kwa ajili ya safari ya kurejea Marekani.

Marekani kufungua ukurasa wa uwekezaji

Na Eleuteri Mangi, MAELEZO
SERIKALI ya Marekani, imeahidi kufungua ukurasa mpya kwa nchi za Afrika Mashariki kwa kuongeza uwekezaji katika sekta mbalimbali ili kuinua uchumi wa nchi hizo.
Kauli hiyo ilitolewa juzi mjini Dar es Salaam na Rais Barack Obama kwenye hotuba yake kwa wafanyabiashara wakati wa ziara yake ya siku mbili nchini Tanzania.
Alisema kuwa hatua hiyo inalenga kuongeza kiwango cha bidhaa kutoka nchi za afrika Mashariki kuingia nchini Marekani na hivyo kuimarisha ushirikiano wa kibiashara na kiuchumi kwa manufaa ya pande zote.
"Sasa ni wakati wa Jumuia ya Afrika Mashariki kuwekeza nchini Marekani ili kuongeza mauzo yake hadi kufikia asilimia 40,î alisema Rais Obama.  
Pia, aliongeza kuwa ushirikiano huo unapaswa kuboresha utoaji wa mizigo katika bandari ya Dar  es salaam na Mombasa kwenda nchi zisizo na bandari ili kuinua uchumi wa eneo hilo kwa kupunguza muda wa mizigo kukaa bandarini.
Akizungumzia hotuba ya Rais Obama, Mwenyekiti wa Shirikisho la Wenye viwanda nchini (CTI), Felix Mosha, alipongeza hotuba hiyo kwa kufungua ukurasa mpya kwa nchi za Afrika na Marekani.
Mosha alisema hotuba hiyo inaonyesha kuwa wakati wa kutegemea misaada umepitwa na wakati badala yake ni kushirikiana katika uwekezaji.
 Katika mkutano huo kiasi cha wafanyabiashara 170 walihudhuria mkutano huo.

JK: Tuchangamkie matumizi ya sayansi na teknolojia

Na Hamis Shimye  
RAIS Jakaya Kikwete amewataka Watanzania kujipanga kisawasawa katika kuharakisha matumizi ya sayansi na teknolojia ili kusaidia kujiletea maendeleo binafsi na nchi.
 Pia, amesema anashangazwa na watu wanaoendelea kupiga kelele juu ya siasa kila siku, huku wakishindwa kuzungumzia mambo muhimu kuhusiana na changamoto juu maendeleo ya sayansi na teknolojia.
 Rais Kikwete alitoa wito huo juzi usiku wakati akifunga mkutano wa Majadiliano ya Pamoja kwa Manufaa ya Wote - Smart Partnership Diaologue katika Ukumbi wa Mikutano wa Kimataifa wa Mwalimu Julius Nyerere, Dar es Salaam.
 Alisema maendeleo hayawezi kuja kama hapatakuwa na uharaka wa matumizi ya sayansi na teknolojia, kwa kuwa ukiwa nyuma kiteknolojia huwezi kufanikiwa kwa jambo lolote.
Tukazane, tujiwekee malengo yetu kwa kuwa nchi zilizofanikiwa zimefika huko kutokana na kuwekeza katika teknolojia ambayo imeweza kuwaletea maendeleo muhimu,” alisema.
Alisema tangu kuanza kwa majadiliano hayo mwaka 1995, kumeonekana kuwa kuna umuhimu mkubwa wa uwekezaji na matumizi ya sayansi na teknolojia katika kuharakisha maendeleo.
 Kwa upande wake, Rais mstaafu wa Msumbiji, Joackim Chisano alisema kupitia majadiliano hayo ana uhakika kila mmoja ataweza kukabiliana na changamoto zinazomkabili kwa upande wa sayansi na teknolojia katika nchi yake.
 Katika hatua nyingine, majadiliano hayo yalihitimishwa rasmi jana, ambapo sekretarieti ya mdahalo huo iliamua mambo mbalimbali, ikiwemo ya kuzitaka nchi za Afrika kuwekeza na kutoa fursa kwa vijana katika nyanja hiyo.
 Majadiliano hayo yaliyofanyika kwa siku tatu yalimalizika juzi na yanatarajia kufanyika mwakani nchini Afrika Kusini kwa baadhi ya viongozi wa Afrika na Asia kukutana na kujadili changamoto wanazokutana nazo katika sayansi na teknolojia.

Dk. Salmin aihimiza UVCCM kukataa ukoloni

NA ABOUD MAHMOUD,ZANZIBAR
RAIS mstaafu wa Zanzibar, Dk. Salmin Amour amewahimiza vijana wa Chama Cha Mapinduzi (UVCCM) kusimama kidete ili  kulinda uhuru na Mapinduzi  ya Zanzibar pamoja na kuyakataa mawazo ya  kinyang’au yenye malengo ya kutaka kukumbatia upya ukoloni.
Dk. Salmim alitoa kauli hiyo nyumbani kwake Migombani mara baada ya Naibu Katibu Mkuu wa UVCCM Zanzibar, Shaka Hamdu Shaka kuhitimisha  ziara ya siku sita katika mikoa mitatu ya Unguja.
Alisema uhuru na ukombozi hupatikana mara moja, hivyo kuwataka vijana wa kizazi kipya kubeba dhamana ya kuulinda uhuru ulioletwa na vyama vya TANU pamoja na kuyatetea kwa nguvu zao zote Mapinduzi ya ASP.
"Pamoja na kuwa kazi ya UVCCM ni kukiimarisha chama chetu, agizo langu kwenu ni kuwa mjipange kupambana na  manyangíau wenye nia ya  kupora uhuru wenu na kuyapoteza Mapinduzi ya Zanzibar,î alisema Dk. Salmin.
Alisema nchi za Afrika, Marekani na Ulaya watu walikataa kutawaliwa na kwamba vijana ndiyo walijitolea maisha yao kupinga ukoloni hadi pale uhuru kamili, dhuluma na manyanyaso yalipomalizika na wananchi kujitawaliwa wenyewe.
Dk. Salmin alitoa mfano wa viongozi kama kina Mahatma Gandhi wa India, Martin Luther King Jr.  wa Marekani, Vladimir Lenin na Max kuwa kati ya viongozi waiokataa kutawaliwa hadi walipojikomboa na kupata uhuru, hivyo ni muhimu kuwekatahadhari dhidi ya manyangíau wanaokumbatia wakoloni.
Aidha, alisema barani Afrika, kamati iliyosimamia ukombozi ya PAFMECA ilisimamia ukombozi na uhuru wa Waafrika hadi ukapatikana, huku akitaja uhuru ni thamani inayojenga utu na heshima yenye gharama.
Akizuingumzia mfumo wa vyama vingi nchini, alisema vijana hawana budi kufahamu kuwa demokrasia hiyo isiwasahaulishe na kupuuzia nguvu za wazee wao waliopigania uhuru hadi Tanganyika na Zanzibar kuwa huru.

ìDemokrasia ya vyama vingi ni jambo zuri... vyama hushinda kwa sera badala ya shari na mivutano, hatua hiyo isitoe kibali ya kuwakumbatia upya  wakoloni ili kutimiza malengo yao, kwa hilo wala msije mkakubali na kuliruhusu,” alisisitiza.

Hata hivyo, Rais huyo mstaafu wa Zanzibar aliwaambia vijana hao kwamba kabla ya kupatikana kwa Uhuru na kupita kwa Mapinduzi, waafrika walinyimwa fursa ya kupata elimu, huduma muhimu za jamii, hivyo dunia inaweza kuwashangaa ikiwa watakubali kurejea tulikotoka.

Dk. Salmin aliwaeleza vijana hao kuwa ushindi wa CCM lazima utokane na nguvu ya umoja miongoni mwao, na kwamba wazidi kuendana pamoja na kuwa tayari kukubali kukosoa, kukosolewa na kuvumiliana.

Alitumia nafsi hiyo kuelezea kuhusu afya yake, ambapo alisema hivi sasa imeimarika kuliko  awali, na kwamba amepata nafuu huku akiwa tayari  wakati wowote kushirikina na wenzake katika kuiendeleza CCM.

“Sijambo...  hivi sasa namshukuru Mungu mtukufu, hali yangu ya sasa si ile ya wakati ule, nazidi kupata faraja kuona mnanikumbuka na kunitembelea, hidaya na tunu muungwana akipewa hupokea na kutakiwa awe ni mwenye kushukuru,” alisema Dk. Salmin.

Mbowe amuumbua Dk. Slaa

Na Mwandishi Wetu
HALI ya sintofahamu juu ya misimamo inayotolewa na uongozi wa juu wa CHADEMA inaendelea kukinzana mara kwa mara, ambapo sasa Mwenyekiti wa Chama hicho, Freeman Mbowe, anaonekana kumgeuka Katibu Mkuu wake, Dk. Wilbroad Slaa.
Hatua hiyo ilitokana na uamuzi wa Mbowe kushiriki dhifa ya kitaifa iliyoandaliwa na rais Jakaya Kikwete kwa ajili ya Rais wa Marekani, Barack Obama, juzi, usiku, IKulu, ambapo awali Dk. Slaa alisema hawatahudhuria.
Dk. Slaa alitoa msimamo huo siku moja kabla ya Rais Obama kuwasili nchini kwa ziara ya kikazi ya siku mbili ilimalizika jana na Rais Obama kurejea nchini mwake.
Akizungumza na gazeti linalomilikiwa na familia ya Mwenyekiti wake (Tanzania Daima), Dk. Slaa alisema CHADEMA, haitashiriki kwenye ziara ya Rais wa Marekani, kwa kuwa hawajaalikwa.
Dk. Slaa alisema hawawezi kuhudhuria ziara ambayo hawakualikwa, na kwamba serikali ndiyo yenye jukumu la kuwaalika watu mbalimbali kwa kuwa yenyewe ndiyo mwenyeji wa Rais Obama.
Alisema hadi kufikia jana jioni, hawakuwa na barua au taarifa ya kiofisi inazoonyesha kualikwa kwao katika ziara hiyo.
Sisi hadi leo (juzi) hatujapewa taarifa yoyote ya kiofisi, kwa hiyo hatuwezi kushiriki, kwani hatujui lolote, tupo kama Watanzania wengine tu,î alisema Dk. Slaa kuliambia gazeti hilo.
Katibu mkuu huyo alisema anashangazwa na usiri wa serikali kuhusu mwaliko wa CHADEMA ambacho ni chama kikuu cha upinzani nchini.
Sisi ni chama kikuu cha upinzani nchinii, hatujaambiwa Obama anakuja kufanya nini na sisi hatujui, lakini pia hatujaalikwa, hatuwezi kwenda sehemu ambayo hatukualikwa,î alisisitiza Slaa.
Hata hivyo, kauli hiyo ilionekana kwenda kinyume kutokana na Mbowe kushiriki dhifa hiyo ya kitaifa iliyoandaliwa na serikali kwa Rais Obama, huku akiwa ameandamana na baadhi ya wabunge wa chama hicho.
Wabunge hao ni pamoja na Naibu Katibu Mkuu wa CHADEMA (Bara), Zitto Kabwe na Ezekiel Wenje ambaye ni mbunge wa Nyamagana ambaye pia ni waziri kivuli wa mambo ya nje na ushirikiano wa kimataifa.
Kushiriki kikamilifu kwenye dhifa hiyo kwa viongozi hao waandamizi wa CHADEMA wakiongozwa na Mbowe, kumeelezwa na baadhi ya wanachama wa chama hicho kuwa Dk. Slaa amekuwa akifanya mambo kwa kukurupuka.
Mmoja wa wanachama aliyezungumza na UHURU akiwa makao makuu ya chama hicho, Dar es Salaam kuhusiana na suala hilo alisema mara nyingi Slaa amekuwa akitolea matamko masuala mbalimbali ya chama hicho kutokana na utashi wake, lakini si msimamo wa chama.
“Mambo kama haya ndio yanayoibua migogoro isiyo ya lazima ndani ya chama kwa kuwa chama kinakuwa na wasemaje wengi kuliko kawaida... leo utamkuta Kigaila (Benson) anasema hivi, mara John Mnyika vile,” alisema mwanachama huyo ambaye hakutaka jina litajwe.
Alisema hali hiyo imekuwa ikimfanya Dk. Slaa mara kadhaa kutoa kauli ambazo muda mwingine amekuwa akizigeuka, ambapo awali aliwahi kusema hawamtambua Rais Kikwete kwa kuwa ameingia madarakani kwa wizi wa kura baada ya kumalizika kwa uchaguzi mkuu wa 2010.
Alisema kauli hiyo ilionekana kukinzana na yeye mwenyewe, ambapo baada ya muda alikwenda Ikulu kuonana na Rais Kikwete wakati akipeleka maoni ya CHADEMA juu ya rasimu ya mabadiliko ya katiba baada ya kuvitaka vyama vya siasa kuonana naye Ikulu kuzungumzia mambo hayo.

Michelle na Laura

Rais Obama amkubali JK

Na Suleiman Jongo
RAIS Barack Obama wa Marekani, amemmwagia sifa Rais Jakaya Kikwete, kwa kusimamia demokrasia barani Afrika.
Pia amempongeza kwa matumizi mazuri ya misaada ya Marekani inayotolewa kwa Tanzania.
Rais Obama aliyewasili nchini jana, amesema amekuwa akivutiwa na jinsi Tanzania chini ya uongozi wa Rais Kikwete inavyotumia vyema misaada ya Marekani, ikiwemo inayotolewa kupitia Mfuko wa Changamoto za Milenia (MCC), hivyo kuimarisha uchumi.
Alitoa pongezi hizo katika mkutano na waandishi wa habari uliomuhusisha pia Rais Kikwete, uliofanyika kwenye viwanja vya Ikulu, mjini Dar es Salaam.

Kiongozi huyo wa Marekani aliyekuwa akizungumza, huku akikumbusha asili yake ni Afrika Mashariki, alisema kupitia miradi hiyo, Tanzania imepiga hatua katika sekta za miundombinu, afya, elimu na kilimo.
Tanzania na Marekani zina miradi mbalimbali ya ushirikiano wa kimaendeleo, ambayo imekuwa na manufaa kwa wananchi, ikiwemo ya MCC, inayolenga kuboresha baadhi ya maeneo yanayohusu maisha ya Watanzania.
Mradi mwingine ni wa AGOA, ambao ni mahsusi kwa ajili ya soko nafuu la bidhaa kutoka Tanzania kwenda Marekani.
Kwa mujibu wa Rais Obama, kutokana na mafanikio hayo, Tanzania ni miongoni mwa nchi nne zitakazonufaika na awamu ya pili ya miradi ya MCC.
Alisema kutokana na kuvutiwa huko, Marekani imepanga kuisaidia zaidi Tanzania ili kujiimarisha, isiwe katika kupokea misaada tu, bali kuzalisha na kufanya biashara.
Rais Obama alimpongeza Rais Kikwete na Rais wa Zanzibar, Dk. Ali Mohammed Sheni, kwa ujenzi wa taasisi za kiserikali na kuimarisha demokrasia, ambayo imekuwa kichocheo cha utulivu na ukuaji uchumi.
Alieleza kufurahishwa na kazi nzuri inayofanywa na Rais Kikwete katika kushughulikia migogoro katika nchi za Maziwa Makuu, ikiwemo Jamhuri ya Kidemokrasi ya Congo (DRC).
Obama akizungumzia suala la DRC, alisema chanzo ni utajiri uliopo ndani ya ardhi ya nchi hiyo na kwamba, mgogoro huo utatatulia kwa nchi jirani kuheshimu mikataba ya amani iliyofikiwa.
Alisema iwapo nchi jirani zitashirikiana kuhakikisha DRC inakuwa na amani, mataifa hayo nayo yatanufaika kwa kufanya biashara, hivyo kukuza uchumi.

Michelle atembelea Makumbusho

NA SELINA WILSON
MKE wa Rais wa Marekani, Michelle Obama, ametembelea Makumbusho ya Taifa, jijini Dar es Salaam, na kuweka shada la maua katika eneo yalikohifadhiwa mabaki ya mlipuko wa bomu katika ubalozi wake nchini.
Michelle alikwenda eneo hilo akifuatana na mke wa Rais Mama Salma Kikwete.
Katika mlipuko uliotokea kwenye ubalozi wa Marekani nchini, Agosti 7, 1998, watu 11 walipoteza maisha na wengine kadhaa walijeruhiwa, huku mali zikiteketea.
Mama Salma na mgeni wake waliwasili katika eneo hilo jana, saa 10.30 jioni.
Katika eneo hilo kuna mabaki ya pikipiki, baiskeli na magari, likiwemo gari la ubalozi huo lenye namba ya usajili T 116 CD 639.
Pia kuna orodha ya majina ya watu 11 waliopoteza maisha katika tukio hilo.
Orodha hiyo iliwekwa na aliyekuwa Balozi wa Marekani wakati huo, Charles Stith.
Majina hayo ni ya Abdulrahman Abdallah, Paul Elisha, Ramadhan Mahundi, Abbas Mwilla, Yusuf Ndage, Bakar Nyumbu, Mtendeje Rajabu, Dotto Ramadhani, Rogath Said, Hasaan Siad na Aimosari Mzee.
Mlipuko huo ulitokea sambamba na mwingine katika ubalozi wa nchi hiyo Kenya, ambako watu 44 walipoteza maisha, kati yao 12 wakiwa raia wa Marekani na wafanyakazi wengine 32 wa ubalozi huo.
Wake hao wa marais walifuatana na wanafunzi Halima Haji na Domina Maile wa Shule ya Sekondari WAMA Nakayama, waliobeba mashada ya maua.
Mama Salma alimuongoza Michelle kuweka shada na baadaye kwenda kwenye ukumbi wa Makumbusho ya Taifa kuangalia burudani.
Michelle alifuatana na wanawe Malia na Sasha, huku Mama  Salma akiwa na wanawe Mwanaasha na Rashid.

Misaada ya MCC imeiinua Tanzania

Na Mwandishi Wetu
RAIS Jakaya Kikwete amesema Mfuko wa Changamoto za Milenia (MCC), umeisaidia Tanzania kutatua changamoto za maendeleo, ikiwemo ujenzi wa miundombinu na kuimarisha sekta ya afya.
Akizungumza wakati wa mkutano na waandishi wa habari kati yake na Rais wa Marekani, Barack Obama, Ikulu, Dar es Salaam jana, alisema miradi hiyo imekuwa na tofauti kubwa ikilinganishwa na misaada ya wahisani wengine.
Rais Kikwete alisema miradi hiyo inatoa fursa kwa nchi kujichangulia vipaumbele vyake, na kuwekeza tofauti na misaada kutoka nchi zingine wahisani.
Alisema kupitia MCC Tanzania imeweza kujenga miundombinu ya barabara, ambayo awali ilikuwa ni changamoto kubwa katika baadhi ya mikoa, ikiwemo Ruvuma na Mtwara.
Kwa mujibu wa Rais Kikwete, kupitia fedha za MCC, Tanzania imejenga barabara mbalimbali, zikiwemo za Namtumbo, Mbinga, Horohoro, Tunduma na Pemba, ambazo zilikuwa vipaumbele vya taifa
Barabara nyingine alisema ni za mikoa ya Rukwa na Mbeya.
Rais alisema mradi mwingine ni wa maji wa Dar es Salaam, ambao umetekelezwa kupitia MCC.
Alisema kupitia fedha za MCC, Tanzania imepunguza maambukizi ya malaria kwa asilimia 50, vifo vya watoto na maambukizi ya virusi vya ukimwi (VVU) kutoka kwa mama kwenda kwa mtoto.
MCC pia umeinufaisha Tanzana katika elimu, ambapo hivi sasa kila mtoto ana kitabu cha sayansi na hesabu tofauti na ilivyokuwa awali, ambapo kitabu kimoja kilitumika kwa watoto watano.
“MCC imetusaidia kupunguza vifo vya wajawazito na watoto, maambukizi ya VVU na maambukizi ya malaria, mambo ambayo yalikuwa yakiathiri ustawi wa jamii,” alisema.
Akizungumzia ujio wa viongozi wa kimataifa, Rais Kikwete alisema hiyo ni neema na ishara ya kufanya vizuri kwa Tanzania katika mambo mbalimbali.
Rais alisema Tanzania itaendeleza amani na utulivu ili kuwa kichocheo cha maendeleo.

RAHA TUPU

Obama awasili

Dar yazizima ujio wa Obama

NA FURAHA OMARY
KUWASILI kwa Rais Barack Obama jijini Dar es Salaam, jana, kulilifanya eneo lote la katikati ya jiji kuzizima, huku mfumo wa maisha, uendeshaji wa shughuli za ofisi na biashara kuchukua sura mpya ambayo haijawahi kutokea.
Ikiwa ni muda mfupi kabla hajapita katika eneo hilo kuelekea Ikulu, wafanyakazi katika majengo ya maghorofa walipigwa marufuku kukaa upenuni mwa majengo au sehemu ya juu ya majengo hayo, hali kadhalika kuchungulia madirishani.
Sambamba na hayo, barabara ya Sokoine ambayo ndiyo aliyopita Rais Obama, hasa kuanzia eneo la Kituo Kikuu cha Polisi hadi Ikulu, umati mkubwa wa wananchi ulifurika kushuhudia ujio huo.
Hata hivyo, wananchi hao waliamliwa na askari polisi waliokuwa wakilinda usalama kusimama upande mmoja ulikopakana na bahari ya Hindi, na kwamba ilikuwa marufuku kwa mtu kusimama upande wa pili.
Maelekezo hayo yalitolewa na askari wa usalama barabarani waliokuwa wakizunguka kutoka eneo moja hadi jingine kwa kutumia pikipiki aina ya Bajaj.
Wakati askari hao wa usalama barabarani wakiendelea na shughuli zao, helikopta ya polisi ilikuwa ikifanya doria, huku trafiki wengine wakitoa maelekezo kwa kutumia vipaza sauti kwa staili ya kuamuru watu watekeleze lile walilolitakiwa kufanya.
Kwa mara ya kwanza helikopta ya polisi ilionekana ikizunguka angani saa 7.45 mchana, katika eneo hilo katika barabara ya Azikiwe, ambapo pia kulikuwa na bendi ya muziki ikitumbuiza, huku baadhi ya wananchi wakiwa wamevalia vitenge, kanga na T-Shirt vikiwa na maneno yaliyosomeka: Barack Obama Karibu Tanzania - Welcome.
Ilipofika saa 8.30 mchana, lilipita gari aina ya Land Cruiser lililokuwa limebandikwa picha za Rais Obama, huku likitoa vipeperushi na bendera ya Marekani na kutangaza kwa kutumia kipaza sauti kwamba mgeni ameshatua katika Uwanja wa Ndege wa Kimataifa wa Julius Nyerere.
Tangazo hilo liliamsha umma wa Watanzania ambao kwa wakati wote tangu saa sita mchana walikuwa wamesimama wakimsubiri kwa hamu kiongozi huyo, hivyo kuamka na kusimama maeneo husika kwa ajili ya kumuangalia.
Licha ya kuamsha shauku ya umati wa wananchi, pia polisi waliwatangazia wafanyakazi katika ofisi zilizopo eneo hilo kufunga vioo vya madirisha, kutochungulia madirishani na wale walionekana juu ya maghorofa kuamriwa kushuka.
Kutokana na amri hiyo, shughuli katika ofisi zilizokuwepo eneo hilo zilisimama kwa kuwa wafanyakazi waliamua kutoka ofisini na kujumuika na wananchi wengine waliokuwa wamejipanga barabarani.
Idadi ya wananchi ilikuwa ikiongezeka kila dakika, hususan wale waliokuwa wakishuka kutoka kwenye pantoni kutoka Kigamboni, walikuwa wakijumuika na wenzao na hata wale walioshuka katika boti wakitokea visiwa vya Pemba na Unguja nao walisimama kuangalia.
Ilipotimu saa 9.35 alasiri, msafara wa Rais Obama ulipita eneo hilo, huku wananchi wakipunga mkono na wengine kushoonya vipeperushi.
Baada ya msafara huo kupita kwenda Ikulu, baadhi ya wananchi walisikika wakilalamika kutokana na kushindwa kumshuhudia kiongozi huyo, na hivyo kuishia kuangalia magari tu.
“Tumekaa hapa tangu mchana tunaungua jua, kumsubiri Rais Obama, lakini tumeishia kuangalia aina ya magari tu waliyokuja nayo, kwani hatujamuona hata kidogo,” alisikika akilalamika mmoja wa wananchi waliokuwa kwenye umati huo.
Baada ya msafara huo kupita, wananchi hao walitawanyika na kwenda kutafuta usafiri, huku askari wa usalama barabarani waliokuwa kwenye bajaj wakitumia kipaza sauti kuwashukuru wananchi kwa utulivu mkubwa waliouonyesha.

KESI ZAENDESHWA ‘CHAP CHAP’
Tofauti na ilivyo siku zote, jana katika Mahakama ya Hakimu Mkazi Kisutu, kesi ziliendeshwa mapema na watuhumiwa kurejeshwa mahabusu kwa kile kilichodaiwa kuhofiwa barabara kufungwa.
Watuhumiwa walifikishwa mahakamani hapo saa moja asubuhi na shughuli za mahakama kuanza mapema, ambapo hadi saa 4.30 asubuhi, mahakama hiyo ilibakiwa na watu wachache, wengi wakikimbilia kumwona Rais Obama.
Mbali na mahakamani, katika benki ya NBC iliyopo katika makutano ya mitaa ya Azikiwe na Sokoine, wafanyakazi wa benki walitoka nje muda mfupi baada ya gari kutangaza kwamba Rais Obama ameshawasili.
Kwa upande wa wafanyabiashara ndogo ndogo wanafanya biashara zao eneo la Posta ya Zamani, nao hawakuonekana kukatiza eneo hilo, tofauti na ilivyokuwa siku za nyuma, ambapo walikuwa wakiweka biashara zao kituoni hapo.

MAMIA WAJITOKEZA, WALONGA
Mwandishi Wetu, Jumanne Gude, anaripoti kuwa, mamia ya wananchi jana walijitokeza kumlaki Rais Barack Obama wa Marekani katika eneo la Posta Mpya, wakati akielekea Ikulu, Dar es Salaam.
Katika barabara ya Kivukoni Front, eneo la Posta Mpya, ulinzi ulikuwa umeimarishwa, ambapo mbwa wa askari wa Marekani walitumika kukagua magari.
Aidha, kulikuwa na utulivu mkubwa kutoka kwa wananchi waliojitokeza katika mapokezi hayo, huku bendi ya matarumbeta ikiwa inatoa burudani.
Ilipofika saa nne asubuhi, shughuli  katika eneo hilo zilisimama kwa muda kutokana mamia ya wananchi kutaka kumwona Rais Obama.
Hata hivyo, baadhi ya wananchi waliotoa maoni yao kuhusu ujio wa Rais Obama, wamesema wanaamini kuwa ujio wa kiongozi huyo utakuwa na manufaa makubwa kwa Tanzania.
Mohamed Kangulu ambaye alijitokeza eneo la Posta Mpya alisema ujio huo utakuwa na faida kubwa endapo mikataba mbalimbali itakayotiwa saini baina ya nchi mbili hizo itatekelezwa ipasavyo na serikali zote.
“Tumeambiwa kuwa atatia saini mikataba ya miradi ya maendeleo ambayo itakuwa ni ukombozi kwa wananchi kiuchumi, hususan katika suala la umeme,” alisema.
Naye Geogre Mhando alisema anaamini ujio wa Obama utakuwa na manufaa kwa Watanzania wote badala ya watu wachache.
Alisema ni nadra wa kiongozi wa nchi kubwa duniani kama Marekani kuzuru nchi masikini kama Tanzania, hivyo anatarajia ujio huo ni muhimu kwa mustakabali wa Watanzania, hususan kiuchumi na kijamii.
Mhando alisema watu wasiwe na mitazamo hasi kuhusu ujio huo, kwani Rais Obama kama kiongozi wa dunia anahitajika mahali pengi duniani, hivyo ziara yake nchini ni ‘bahati ya mtende’.
Alisema Tanzania bado inakabiliwa na changamoto mbalimbali, hivyo ziara ya kiongozi huyo utasaidia angalau kutoa mwangaza kwa changamoto hizo.
Grace Mashalla mkazi wa Kimara, alisema amefurahishwa na ujio wa kiongozi huyo wa Marekani na kuongeza anaiona ziara hiyo kama ‘mgeni njoo mwenyeji apone’.
Anasema anaamini kwamba ziara hiyo itakuwa na manufaa makubwa kiuchumi na kijamii, licha ya kauli za uchochezi za baadhi ya watu wasioitakiwa mema Tanzania.
Grace alisema Tanzania na Watanzania wanapaswa kuichukulia ziara hiyo kwa mikono miwili, licha ya changamoto mbalimbali zinazoikabili nchi na watu wake.
Hata hivyo, alisema Watanzania waichukulie ziara ya Rais Obama na ujumbe wake kama neema ya kipekee, hasa ikizingatiwa kuwa baadhi ya nchi kadhaa zinahoji ujio wake hapa nchini.

HALI ILIVYOKUWA JNIA
Katika eneo la nje ya Uwanja wa Ndege wa Kimataifa wa Julius Nyerere (JNIA), mamia ya wananchi kutoka maeneo mbalimbali ya jiji la Dar es Salaam, walijitokeza kwa wingi kumlaki Rais Barack Obama.
Wananchi walianza kukusanyika nje ya uwanja huo uliopo maeneo ya Kipawa, kuanzia saa mbili asubuhi, na kujikusanya katika vikundi wakiwa na shauku ya kutaka kumuona kiongozi huyo wa dunia.
Idadi ya wananchi katika eneo hilo ilikuwa ikiongezeka kila dakika na hadi kufikia saa sita mchana, nje ya uwanja huo kulikuwa kumefurika mamia ya wananchi.
Kutokana na ujio huo, magari yaliyokuwa yakiingia uwanjani hapo kupeleka abiria yalikuwa hayaruhusiwi kutoka, hivyo abiria waliokuwa wakitoka maeneo tofauti kulazimika kutembea kwa mguu hadi maeneo ya Jet ili kutafuta usafiri mwingine.
Hali ya ulinzi na usalama nje ya uwanja ilikuwa imeimarishwa maradufu, ambapo askari wa kikosi cha mbwa na farasi, upelelezi, usalama barabarani na doria walikuwa imara.
Ilipofika saa 5.45 asubuhi, magari ya abiria yaliyokuwa yakitokea maeneo ya Gongo la Mboto kuelekea mjini, yalizuiwa kupita barabara ya Nyerere na badala yake yalikuwa yakipita barabara ya Segerea, Tabata, Mandela na Uhuru.
Saa 6.15 mchana, wananchi waliokuwa wamejipanga nje ya uwanja huo, walipigwa na butwaa baada ya kuona magari maalumu ya Marekani yaliyokuwa yakielekea uwanja wa ndege ili kuwachukua wageni waliofuatana na Rais Obama.
Magari hayo maalumu yalikuwa na rangi nyeusi na muundo wa kipekee na kuwafanya wananchi wengi kuyashangaa.
Ilipofika saa 8.20 mchana, barabara yote ya Nyerere ilikuwa nyeupe na hakukuwa na gari lolote lililokuwa likipita katika barabara hiyo.
Wananchi walijipanga barabarani kuanzia nje ya uwanja wa ndege hadi maeneo ya Tazara, ambapo kila mmoja alikuwa na shauku ya kumuona Rais Obama.
Shughuli mbalimbali za kijamii, hususan biashara za Wamachinga, zilisimama kwa muda kutokana na wananchi wengi kujipanga mstari kando kando mwa barabara hiyo.
Majira ya saa 8.35 mchana, ndege ya Air Force One iliyombeba Rais Obama na mke wake Michelle, ilitua katika uwanja huo na hivyo kuamsha shangwe na vifijo kutoka kwa Watanzania waliofika maeneo hayo kumlaki mgeni huyo na ujumbe wake.
Baada ya wananchi kuiona ndege hiyo, waliingiwa na kiwewe cha furaha na kila mmoja alikaa eneo ambalo angemuona kwa urahisi Rais Obama wakati akipita.
Mara baada ya kuwasili, Rais Obama akiwa na mwenyeji wake Rais Jakaya Kikwete walipigiwa nyimbo za mataifa yaona mizinga 21, na kisha Rais Obama kukagua gwaride la heshima lililoandaliwa na askari wa kikosi cha Jeshi la Wananchi wa Tanzania (JWTZ).
Baada ya shughuli hiyo, Rais Obama akiwa na Rais Kikwete, walipita kukagua vikundi mbalimbali vya ngoma na kusalimiana na viongozi waliofika kumlaki.
Baadaye msafara wa rais Kikwete ulitangulia kuondoka uwanjani hapo kuelekea Ikulu kwa ajili ya kumpokea Obama, ambapo baada ya muda msafara wa Rais Obama uliondoka uwanjani kuelekea Ikulu.
Magari yaliyombeba kiongozi huyo wa dunia, yaliondoka uwanja wa ndege kwa mwendo wa kawaida ambapo wananchi waliojipanga kumuona walikuwa wakipeperusha bendere za Tanzania na Marekani.
Hata hivyo, baadhi ya wananchi walishindwa kumuona kutokana na gari alilopanda kuwa na vioo vya kiza

URAFIKI WA UKWELI

GAZETI LAKO HILI LIKO MTAANI